Ata-babamyzda ýyzyna jaryǵan degen kıeli sóz bar. Ásirese, tekti parasatty, kisilikti adam kórsek, ýyzyna jaryp ósken azamat eken dep súıispenshilik bildirip jatamyz. Al bul degenińiz adam balasynyń boıyndaǵy asyl qasıetterdiń barlyǵy ana sútimen daryp, jetiletindigin bildirse kerek.
Al qazir sol ýyzyna jaryp óser urpaq sany azaıyp bara jatqany jasyryn emes. Týǵan sábıin ana sútimen qorektendirip, tabıǵı tamaqtandyratyn analardyń sanynyń azaıyp bara jatqanyna Dúnıejúzilik densaýlyq saqtaý uıymy osydan jıyrma jeti jyl buryn dabyl qaǵyp, ózimiz umytyp bara jatqan jańa týǵan balany týa salysymen ana baýyryna salyp, birden ana sútimen aýyzdandyrý kerektigin aıtyp dabyl qaqty. Tipti arnaıy baǵdarlama da qabyldandy. Osydan eki jyl buryn ol baǵdarlamanynyń qolǵa alynǵanyna shırek ǵasyr tolǵanyn atap ta óttik. Qazir ózge ult ókilderi turmaq, ózimizdiń qarakóz kelinshekterimiz balany emizýdi artyq jumys sanap, «ana sútimen para-par» degen jarnamasy jalaýlatylǵan jasandy sútke ıek artyp alǵandaı. Onyń ústine ana sútiniń qadir- qasıetin túsindiretin burynǵy eneler men analar qatary da sıreı bastaǵandaı. Ózi balasyn jasandy sútpen qorektendirgen ana men ene qyzy men kelinine bala úshin ana sútinen ardaqty astyń joqtyǵyn qaıdan túsindirsin?! Perzenthanalarda jańa bosanǵan jas analardy bala emizýge ıekemdep, sábıi emshek sútimen aýyzdanǵansha kómek kórsetetin mamandar bar, biraq ol mamannyń úsh-tórt kúngi keńesi keıbir jas analardyń boıyna sińip úlgermeıtini taǵy bar. Osy olqylyqtardyń orynyn toltyrý maqsatynda qalamyzdaǵy №29 qalalyq emhanada «Jas analar» kabıneti ashyldy. Munda jas bosanǵan kelinshekterdi sábılerin ana sútimen qorektendirýge jáne olardyń densaýlyǵyn kútip baptaýǵa, oqys jaǵdaılarda sábıine alǵashqy kómek kórsetýge beıimdeıdi.
"Kabınet jumysynyń basty mindeti– jas analarǵa tek sábıin ana sútimen qorektendirýge beıimdep qana qoımaı, týylǵan kúninen bastap kútip-baptaý men durys qundaqtap, densaýlyǵyn kútýdi de úıretý. Ol úshin olarǵa emhananyń bala dárigerlerimen qatar, qalamyzdaǵy ana sútimen qorektendirý baǵdarlamasy boıynsha qurylǵan ortalyqtyń bilikti mamandary ana sútimen qorektendirýdiń mańyzyn túsindirip, aqyl-keńes beredi. Arnaıy shaqyrylǵan kóp bala tárbıelep ósirgen analarymyz ben aqylman ájelerimiz kelip, ózderiniń tájirıbelerimen bólisedi. Sonyń nátıjesinde sońǵy eki-úsh jylda jas analar arasynda balalaryn ana sútimen tamaqtandyryp, besikke bóleıtinder qatary artyp keledi", – deıdi «Jas analar» kabınetiniń meıirbıkesi Alına Núrkeeva.