Aral teńizi jaıly óz zertteýin júrgizip jatqan amerıkalyq ǵalym kitap jazýdy qolǵa aldy.
Sara Kemeron sol úshin Qazaqstan men Ózbekstanǵa attanyp, máseleni tereńirek qarastyrmaq, dep habarlaıdy Almaty-akshamy.kz 24.kz-ke silteme jasap.
Buǵan deıin qazaq dalasyndaǵy asharshylyqty zerttegen ol «Asharshylyq jaılaǵan dala» atty kitabyn jaryqqa shyǵarǵan bolatyn. Qazaqstanda birneshe márte bolǵan profesor: «Bir teńizdiń eki jaǵalaýynyń jaǵdaıyn kórý tarıhtyń eń qyzyqty aspektileriniń biri», deıdi. Ózbekstan jaǵynda sý 1960 jyldary tartylsa, Qazaqstanda on jyl keıin tartylǵan. Bunyń sebepteri ártúrli. Jalpy Aral taqyrybynda kóptegen ǵylymı zertteýler júrgizilgen. «Mysaly hımıalyq, fızıkalyq jaǵynan eńbekter bolǵanymen, tabıǵı daǵdarys aımaqtaǵy adamdarǵa qalaı áser etkeni týraly bizde tolyq túsinik joq», - deıdi ǵalym.
Sara Kemeron, ǵalym-sarapshy:
- Men turǵyndardyń kórgen qasiretine ǵana emes, sol jerde ómir súrýge tyrysqan áńgimelerine nazar aýdarǵym keledi. Meni sol jerdegi adamdardyń aýyzbirshiligi tańǵaldyrdy. Halyqtyń deni turyp jatqan qalalaryn jaqsy kóredi, sonda qalǵylary keledi. Týyp ósken jeri, ata-babasynyń mekeni olar úshin mańyzdy. Kitabymda jazǵym keletin bir másele osy. Keıbireýler jergilikti halyqty apat aımaǵynan kóshirip tastaıyq deýi múmkin. Biraq bul kózqaras durys emes dep oılaımyn. Turǵyndar ne qalaıtynyn bilý kerek. Jalpy aımaqtaǵy mıgrasıa máselesi áli de zertteýdi qajet etedi. Qansha adamnyń qaıda jáne qashan kóshkeni týraly málimetterdi arhıvterden jınaýǵa tyrystym. Jalpy Aral tarıhy amerıkalyq aýdıtorıa úshin óte qyzyqty jáne mańyzdy.