Týrızm ulttyq ekonomıka ósimine tyń serpin beretin baǵytqa aınalýda. Memleket basshysy Qasym-Jomart Toqaev aıqyndap bergen salany damytý jónindegi basymdyqtarǵa sáıkes, «AMANAT» partıasy elimizdiń negizgi tabıǵı landshafttaryn qamtıtyn ulttyq týrısik soqpaqtar júıesi – «Alataý amanaty» jobasyn iske qosty.
Joba İle-Alataý memlekettik ulttyq tabıǵı parki aýmaǵyndaǵy Aıýsaı shatqalynda bastaý aldy. İs-sharaǵa Májilis Spıkeri, «AMANAT» partıasynyń Tóraǵasy Erlan Qoshanov, Týrızm jáne sport mınıstri Erbol Myrzabosynov, Almaty qalasynyń ákimi Darhan Satybaldy, Almaty oblysynyń ákimi Marat Sultanǵazıev, depýtattar, Májilis janyndaǵy Qoǵamdyq palata músheleri, «Kaz Alpine Club» belsendileri, týrısik, ekologıalyq uıymdardyń ókilderi, «Jastar Rýhynyń» belsendileri qatysty.
«Búginde týrızm ekonomıkalyq ósimge tyń serpin beretin baǵytqa aınalýda. Týrızm – bul jańa munaı. Sondyqtan Memleket basshysy osy sektordy damytý qajet ekenin únemi aıtyp keledi. Prezıdentimiz júrgizip jatqan ishki jáne syrtqy syndarly saıasaty arqyly elimizde beıbitshilik pen turaqtylyq, kórshiles memlekettermen dostyq qarym-qatynas ornady. Nátıjesinde – sheteldik týrıser halqymyzdyń qonaqjaılyǵyn jaqsy biledi jáne Qazaqstanǵa erekshe yqylaspen keledi. Búgingi «Alataý amanaty» jobasy qazaqstandyq týrızmdi damytý baǵytynda jasalǵan taǵy bir mańyzdy ári júıeli qadam ekenine senimdimin», – dedi Erlan Qoshanov.
«Alataý amanaty» jobasy Sharyn shatqalynan bastap, Tamǵaly-tas arheologıalyq keshenine deıingi 1200 shaqyrymnan astam qashyqtyqty alyp jatatyn uzyn-sonar ulttyq soqpaq salýdy kózdeıdi. Baǵyt boıynda 270 myńnan astam turǵyny bar 24 ınfraqurylym nysany men 20 eldi meken ornalasqan. Týrıser etnoaýyldarǵa, glempıngterge, kempıngterge, vızıt-ortalyqtarǵa, qutqarý stansalaryna, sondaı-aq gastronomıalyq jáne etnomádenı týrızm oryndaryna bara alady. Bolashaqta munda shytyrman oqıǵaǵa toly ishki jáne halyqaralyq týrızmge arnalǵan tutas ekojúıe paıda bolady. «Alataý amanaty» jobasy týrızm salasyn damytýdy ǵana emes, aýyl turǵyndarynyń ekonomıkalyq belsendiligin arttyrýdy kózdeıdi.
Soqpaq boıyndaǵy negizgi aıaldamalar qazirdiń ózinde týrısik tartymdylyǵy bar oryndarǵa aınalýda. Osyndaı nysandardyń qatarynda «Esik» memlekettik tarıhı-mádenı mýzeı-qoryǵy, Kók Jaılaý shatqaly, Býtakov shatqaly, Alma-Arasan ystyq bulaqtary, Úlken Almaty kóli, VIII-XIII ǵasyrlardaǵy Talhız qalashyǵy, sondaı-aq «Oi-Qaragai» taý kýrorty bar.
Joba iske qosylǵan kúni qatysýshylar «Taza Qazaqstan» jalpyulttyq aksıasy aıasynda taýda qoqys jınap, ploggıng – ekologıalyq is-shara ótkizdi.
«Alataý amanaty» jobasyn bir jarym jylda júzege asyrý josparlanýda. Májilistegi «AMANAT» partıasy fraksıasy sarapshylarmen birlesip, jobaǵa zańnamalyq qoldaý kórsetedi. Týrısik soqpaqtardy quqyqtyq turǵyda retteıtin baza qurylady, sondaı-aq olardy jobalaý men abattandyrýdyń biryńǵaı erejeleri ázirlenedi. Bolashaqta shytyrman oqıǵaǵa toly týrızmdi damytýdyń osy tásilin el aýmaǵynda keńinen qoldaný josparlanýda.