Endi Kaspi.kz qosymshasy arqyly polısıaǵa aryzdanyp, jol-kólik oqıǵasy, jol qozǵalysy erejelerin buzý, turmystyq zorlyq-zombylyq jáne basqa da oqıǵalar týraly habarlaýǵa bolady, dep habarlaıdy Aqshamnews.kz tilshisi.
Qyzmetti paıdalaný úshin Kaspi → Memlekettik qyzmetter servısi → Zań jáne tártip, osy jerdegi tizimnen polısıaǵa habarlaǵyńyz keletin nárseni tańdap, ary qaraı qadamdardy oryndasańyz boldy.
Banktiń negizin qalaýshylardyń biri Mızaıl Lomtadze:
"Kaspi.kz sýperqosymshasyn 15 mıllıonnan astam qazaqstandyq paıdalanady. "Memlekettik qyzmetter" servısi arqyly bizdiń súıikti klıentterimiz kúndelikti kóptegen máselelerin sheshedi – júrgizýshi kýáligin aýystyrý, kólikti qaıta rásimdeý, sıfrlyq qujattardy qoldaný, turǵylyqty jeri boıynsha tirkelý, bala týý týraly kýálik alý jáne t.b. Azamattardyń qaýipsizdigin arttyrý úshin memlekettik organdarmen birlesip, Kaspi.kz qosymshasy arqyly polısıaǵa jedel júginý múmkindigin iske qostyq. Joba İİM, SDIAÓM jáne Kaspi.kz komandalarynyń úılesimdi jumysynyń nátıjesinde júzege asty. Memlekettik qyzmetterdi damytý – bul bizdiń áleýmettik jaýapkershiligimiz jáne komersıalyq emes bastamamyz. Birlesken kúsh-jigerimizdiń arqasynda biz kóptegen elderdegi qyzmetterden tıimdi ári yńǵaıly onlaın servıster jasap jatyrmyz, bul qazaqstandyqtar úshin maqtanysh. Bizge senim artqany jáne memlekettik qyzmetterdi qazaqstandyqtarǵa qoljetimdi etý múmkindigi úshin memlekettik organdarǵa alǵys aıtamyz!" dedi ol.