Jyldyń bastaýy bolǵan 13 naýryzdy mańǵystaýlyqtar bıyl da ádetten tanbaı, «Adaı ata-Otpan taý» tarıhı-mádenı kesheninde qarsy aldy.
Jyldaǵy dástúrmen kópshilik batys Qarataýdyń eń bıik núktesi Otpan taýdyń basyna jınaldy, dep habarlaıdy Almaty-akshamy.kz
Taýdyń eń bıik núktesinde «Birlik» otyn jaǵyp, qazaq eline beıbit ǵumyr tiledi. Bıylǵy sharaǵa 10 myńǵa jýyq adam jınalǵan. Olardyń qatarynda Túrkıa, ózbek-qyrǵyz elderi men Ázirbaıjannan kelgen delegattar bar. Kórisý merekesinde kún raıy da qýantty, aýa temperatýrasy +20 gradýsqa deıin kóterildi. Taý etegindegi «Qarashańyraq» kesheni aldyna 50-ge tarta kıiz úı tigildi. Tańsáriden jıylǵan kópshilik bir-birimen qushaq jaıa kórisip, qystan aman-esen shyǵýymen quttyqtady.
Ár shańyraq ıesi qazan toltyra as salyp, tórge ozǵan adamǵa ulttyq sýsyn shubat-qymyz ben baýyrsaq usyndy. Bul kúni Mańǵystaýǵa elimizdiń ár óńirinen syıly qonaqtar keldi.
«Endi bastalyp jatqan kezinde kelip edim. Jalpy, ómirdiń ózi salystyrýmen ótetin nárse ǵoı, qaı kezde de. Ol kezde úılerdiń de jaǵdaılary onsha bolmaǵan edi. Qazir eldiń ál-aýqaty jaqsarǵanyn kórsetip tur. Aýmaqty shara bolyp jatyr. Sol ata-babanyń atyn dáristep, keleshek urpaqqa bir tálim-tárbıe bolsyn degen maǵyna ǵoı», - deıdi sharaǵa qatysýshy Shaıqula Aldabergenuly.
Konserttik sharadan bólek alańda ulttyq oıyndar ótkizildi. Er-azamattar arqan tartýdan synǵa tússe, balalar asyq atýdan mergendik tanytty. Jeńimpazdarǵa baǵaly syılyqtar berildi. Jasy 95-ke kelgen qarıanyń aq batasyn berip, kópshilik dástúrli sharanyń eń mańyzdy bólimi - «Birlik» otynyń jaǵylýyn asyǵa kútti. «Birlik» oty tutanyp, alaý Otpan taýdyń basyna jetkizilip, qazaq memlekeketi álemge pash etken beıbitshilik, birliktiń aıqyn kórinisi retinde mazdap turady.