Qazaqstannan Qytaıǵa ótetin 3 myńǵa jýyq vagon shekarada turyp qaldy, dep habarlaıdy aqshamnews.kz
Qazan aıynda Qytaı tarapy táýligine qabyldaıtyn poıyzdar sanyn 14-ten 10-ǵa deıin azaıtqan, al keı kúnderi bul kórsetkish 6% deıin tómendegen. Buǵan Qytaıdyń ýákiletti organdarynyń astyq ónimderin tereń tekserýge kóshýi sebep bolyp otyr. Tekserý kezinde astyqtan synama alynyp, olar Úrimji men Beıjiń qalalaryndaǵy zerthanalarda saraptamadan ótedi. Bul proses 5–10 táýlikke deıin sozylady.
Osyndaı uzaq tekseris saldarynan Qytaı baǵytyna bet alǵan eksporttyq jáne tranzıttik júkteri bar vagondar shekara mańynda jınalyp qaldy. QTJ málimetinshe, bul qalypty deńgeıden áldeqaıda joǵary kórsetkish.
Kompanıa ınfraqurylymnyń qaýipsiz ári turaqty jumysyn saqtaý úshin ýaqytsha shekteý engizdi. Endi konteınerlik poıyzdarmen jóneltiletin eksporttyq astyq ónimderi táýligine úsh quramnan aspaýy tıis.
Mekeme bul sharanyń ýaqytsha jáne májbúrli ekenin atap ótti. Shekteý Qytaı tarapyndaǵy qabyldaý múmkindigimen poıyz qozǵalysyn úılestirý maqsatynda engizildi.