Elimizde satylǵan 14 myńǵa jýyq altyn quımanyń kóp bóligin almatylyqtar alǵan.
2024 jyldyń III toqsanynda ekinshi deńgeıli bankter men banktik emes jekelegen aıyrbastaý pýnkterinde jalpy salmaǵy 475,5 keli 13 940 altyn quıma satyldy, dep habarlaıdy aqshamnews.kz
Ulttyq Bank 2017 jyly halyqqa tazartylǵan altyn quımalardy satý jáne satyp alý baǵdarlamasyn iske qosqan bolatyn. Baǵdarlama bastalǵaly jalpy salmaǵy 7,4 tonna bolatyn 199 235 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 gram. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi – 24% (48 629 dana). Odan keıin 100 gramdyq altyn quımadan 47 227 dana (24%), 5 gramdyq quımadan 44 127 dana (22%), 20 gramdyq quımadan 31 612 dana (16%) jáne 50 gramdyq quımadan 27 640 dana (14%) satylǵan, – delingen UB habarlamasynda.
Aqparatqa sáıkes, 2024 jylǵy III toqsanda altyn quımalardyń eń kóp bóligi Almatyda (8 101 dana, 58%), Shymkentte (1 279 dana, 9%) jáne Astanada (1 243 dana, 9%) satyldy.
Baǵdarlama iske asqaly ekinshi deńgeıli bankter men banktik emes jekelegen pýnkter jalpy salmaǵy 1,1 tonna 41 058 altyn quımany keri satyp alǵan. Bul – jalpy satylǵan altyn quımalardyń 21%-y. Olar keri satyp alýǵa qabyldaǵan ólshemeli quımalardyń barlyǵy halyqqa Ulttyq Banktiń fılıaldaryna keri tapsyrýsyz satylady.
Árbir quıma qorǵaý elementterimen qaptalǵan (quımanyń aına beti, mıkrotekst jáne bederli jıegi bar) jáne mehanıkalyq zaqymdanýdan qorǵaıtyn arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz, – delingen aqparatta.
Qazir altyn quımalardy birqatar ekinshi deńgeıli bankke, sondaı-aq banktik emes jekelegen pýnkterden satyp alyp, keri satýǵa bolady.