"Úzdik jattyqtyrýshy" ataǵyna Myrzaǵalı Aıtjanov laıyqty dep tanyldy.
12 jeltoqsan kúni Ulttyq Olımpıadalyq komıtet jyldyń sporttyq oqıǵalaryn qorytyndylady, dep habarlaıdy Almaty-akshamy.kz olympic.kz saıtyna silteme jasap.
Elordadaǵy Kongres ortalyqta Qazaqstan Táýelsizdiginiń 30 jyldyǵyna arnalǵan «Altyn Samǵaý-2021» Ulttyq sporttyq júldesin saltanatty túrde tabystaý rásimi ótti.
Kesh qonaqtary qatarynda sportshylar, jattyqtyrýshylar, sport ardagerleri, memleket qaıratkerleri men sporttyq uıymdardyń basshylary boldy. Olardyń qatarynda QR Premer-Mınıstri Asqar Mámın men Qazaqstan UOK basshysy Tımýr Qulybaev ta bar.
Pandemıaǵa baılanysty shekteýlerge oraı, salanatty shara elimizdiń úsh qalasynda bir mezgilde ótti. Sharanyń negizgi bóligi Nur-Sultanda uıymdastyrylsa, Almaty men Túrkistanda jasaqtalǵan arnaıy stýdıadan onlaın kórsetilim júrgizildi. Bul úmitkerler men qonaqtardyń qaýipsizdigi úshin mańyzdy ekenin aıta ketken jón. Qazaqstannyń Táýelsizdik jyldaryndaǵy Olımpıada jeńimpazdary men júldegerleri keshtiń qurmetti qonaǵy atandy.
«Sportshylardyń tabysy men jeńisin biz maqtan etemiz. Jeńistiń qurmetine táýelsiz Qazaqstannyń baıraǵy kóterilip, elimizdiń ánurany shyrqalady. Biz sizderdiń jetistikterińizben maqtanamyz. Sizderdi jas urpaq úlgi etedi. Sizderge densaýlyq, baqyt, tabys jáne jańa jeńister tileımiz», - dedi jıynda sóz alǵan UOK basshysy Tımýr Qulybaev.
Kóptegen atalym boıynsha úzdikterdi jankúıerler tańdady. 22 qarasha men 6 jeltoqsan aralyǵynda olar ózderiniń súıikti sportshylaryn Olympic.kz saıtynda daýys berý arqyly anyqtady. «Úzdik sportshy» jáne «Úzdik sportshy qyz» atalymynda qysqy jáne jazǵy sport túrlerinen tórt jeńimpaz tańdaldy.
Tokıo-2020 Olımpıadasynyń qola júldegeri ári álem chempıony Sáken Bıbosynov, karateden Tokıo-2020 Olımpıadasynyń jáne álem chempıonatynyń qola júldegeri Sofá Berýlseva, sondaı-aq, short-trekten álem kýbogi kezeńderiniń júldegeri Denıs Nıkısha men frıstaıl-mogýldan álem chempıonatynyń júldegeri Iýlıa Galysheva júlde ıegeri atandy.
«Meni úzdik sportshy dep tanyǵany úshin óte baqyttymyn. Alaıda, bizdiń sportshylardy túgel jeńimpaz dep esepteımin. Sońǵy eki jyl barlyǵymyz úshin qıyn bolǵany jasyryn emes. Jarystar keıinge shegerilip, tipti, múlde ótpeı qaldy. Aılar boıy jattyǵý jasaýdyń ózi muń boldy. Sondyqtan, búgin chempıondar men sportshylar bas qosqan jıynǵa qatysý úlken abyroı. Mundaı baıqaýǵa alǵash ret qatysyp turmyn. Ulttyq sporttyq júlde barlyq olımpıada chempıondary men sport ardagerleriniń basyn qosatyn birden-bir jıyn. Solarmen bir qatarda turý men úshin úlken mártebe. Maǵan daýys bergen árbir adamǵa alǵys aıtamyn. Bizdiń týymyz álemdik jarystarda kókke kóterilýi úshin men ári qaraı eńbektenemin», - dedi Sáken Bıbosynov.
Qysqy sport túrlerindegi komandalar Olımpıadaǵa daıyndyq ústinde. Olar qazirgi sátte 2022 jylǵy Beıjiń Olımpıadasyna daıyndalý ústinde. Sol sebepti, saltanatty is-sharaǵa qatysa alǵan joq.
«Maǵan daýys bergen barshańyzǵa alǵysymdy joldaımyn. Ókinishke qaraı, biz osymen birneshe ret elimizdegi eń basty oqıǵadan syrt qalyp jatyrmyz. Biz qazir Olımpıada qarsańyndaǵy mańyzdy jarystarda baq synaýdamyz. Lısenzıa jolyndaǵy týrnırler ótýde. Sondyqtan, barsha jankúıerlerdi bizdi qoldaýǵa shaqyramyn», - dedi Iýlıa Galysheva.
"Úzdik jattyqtyrýshy" ataǵyna Myrzaǵalı Aıtjanov (bokstan Qazaqstan komandasynyń aǵa bapkeri jáne Sáken Bıbosynovtyń jeke jattyqtyrýshysy) pen Mádiǵalı Qarsybekov (short-trekten Qazaqstan komandasynyń bas bapkeri) jazǵy jáne qysqy sport túrleri boıynsha laıyqty dep tanyldy.
«Jyldyń úzdik komandasy» ataǵyn fýtzaldan Qazaqstan quramasy enshiledi. Bıyl fýtzalshylar álem chempıonatynyń jartylaı fınalyna shyǵyp, tórtinshi orynǵa taban tiregen bolatyn. "Jyl jańalyǵy" atalymynda Tokıo-2020 Olımpıadasynyń qatysýshysy ári álem chempıonatynyń qola júldegeri Nurqanat Ájiqanov top jardy. Ol álem chempıonatyndaǵy komandalyq synda da qola jeńip alǵanyn eske salamyz.
«Úzdik aımaq» atalymynda ózgerister bar. Bıyl uıymdastyrýshylar olımpıadalyq sport túrleri boıynsha 36 ulttyq federasıaǵa tizgin berip, úzdik aımaqty federasıa ókilderi anyqtady. Óte tartysty ótken daýys berý nátıjesinde Almaty qalasy Almaty oblysyn bir upaı basymdyǵymen utyp, jeńiske jetti.
«Úzdik ulttyq sporttyq federasıa» atalymynda Qazaqstan tenıs Federasıasy top jardy. Jeńimpazdy Qazaqstan UOK janynan qurylǵan arnaıy komısıa anyqtady. Federasıanyń jumysy kóptegen talaptar boıynsha tekserildi: ınfraqurylymdy damytýǵa qosqan úlesi, aımaqtardaǵy sporttyń damýy, jarystardy ótkizý deńgeıi, belsendiligi, halyqaralyq arenadaǵy bedeli jáne sporttyq nátıjeleri. Tenıs federasıasy barlyq talaptar boıynsha úzdik shyqty.
Paralımpıadalyq sport túrleri boıynsha úzdik sportshy ataǵy paýerlıftıngten Tokıo-2020 Paralımpıadalyq oıyndarynyń jeńimpazy Davıd Degtárovqa berildi. Paralımpıadalyq sport túrleri boıynsha úzdik jattyqtyrýshy ataǵyna paradzúdodan Qazaqstan komandasynyń bas bapkeri Jandos Qıanov laıyq dep tanyldy. Onyń úsh shákirti – Ánýar Sarıev, Dáýlet Temirjanov jáne Zarına Baıbatına Tokıo-2020 Paralımpıada oıyndarynda úsh kúmis medal jeńip alǵan.
Jyldyń sport oqıǵasyn qorytyndylaǵan keshte qazaqstandyq atletterdi barlyq jattyǵý jıyndary men jarystarǵa bastap aparatyn keshendi-ǵylymı top músheleri de eskerýsiz qalǵan joq.
«Sporttyq medısına boıynsha úzdik maman» ataǵy dáriger Azamat Nurmatovqa berildi. Ol Tokıo-2020 Olımpıada oıyndarynda medısınalyq shtabtyń bas dárigeri retinde jumys istedi, sondaı-aq, Olımpıadaǵa daıyndyq kezinde sportshylardyń qaýipsizdigin saqtaý jónindegi toptyń quramynda boldy. Eń aldymen, KǴT mamandary men UOK arnaıy Jedel shtabynyń birlesken jumysynyń nátıjesinde Qazaqstan komandasy tolyq qurammen Olımpıadaǵa baryp keldi.
Ulttyq Olımpıadalyq komıtettiń arnaıy dástúrli júldesi – «Qazaqstan sportynyń maqtanyshy» otandyq sporttyń damýyna ólsheýsiz úles qosyp, bolashaq chempıondarǵa úlgi atanǵan sportshylar men qaıratkerlerge tabystalady. Bıyl bul júlde grek-rım kúresinen Olımpıada chempıony, 1981 jylǵy álem chempıony, KSRO-ǵa eńbek sińirgen sport sheberi jáne Qazaq KSR-nńi eńbek sińirgen jattyqtyrýshysy Jaqsylyq Úshkempirovke berildi. Júldeni dańqty qazaq balýanynyń uly, búginde ákesiniń atyndaǵy sporttyq keshendi basqaryp otyrǵan Jandos Úshkempirov aldy.
Ádettegideı, júldeni tabystaý rásimi tanymal sportshylar men dańqty sport ardagerlerine, Qazaqstannyń tanymal memleket jáne qoǵam qaıratkerlerine berildi. Sahnaǵa Olga Rypakova, Dmıtrıı Balandın, Serik Sápıev, Iýrıı Melnıchenko, Olga Shıshıgına, Álıa Iýsýpova kóterildi. Olarmen birge júldeni arhıtektor, Qazaqstannyń memlekettik eltańbasynyń avtory Jandarbek Málibekov, QazVac vaksınasyn jasaýshy, «Bıologıalyq qaýipsizdik máseleleri boıynsha ǵylymı-zertteý ınstıtýtynyń» bas dırektory Kúnsulý Zakará, aktrısa, Kann kınofestıvaliniń júldegeri Samal Eslámovalar tabystady.
Resmı marapattaý rásimi aıaqtalǵan soń kesh konserttik baǵdarlamaǵa ulasty. «Ninety One» toby, Marhaba Sábı, Marsel, Mádı Syzdyqov jáne Sáken Maıǵazıevpen bir sahnada atletterimiz de óner kórsetti. Dzúdodan Qazaqstan komandasynyń kóshbasshysy Eldos Smetov Sáken Maıǵazıevpen dýet aıtsa, sport ardageri, sý dobynan Olımpıada chempıony Sergeı Kotenkov jáne batýttaǵy gımnastıkadan komanda úzdigi Pırmammad Alıev ánshi Marselmen birge «Mne s detstva snılas vysota» ánin oryndady.