28 jastaǵy jas áıel jetinshi aýrýhanaǵa jiti pankrenekroz jáne isiný belgilerimen jedel túrde jetkizilgen. Óziniń aıtýynsha, únemi oń jaq qabyrǵasynyń asty aýyrǵan. Buǵan deıin birneshe ret aýrýy asqynyp, oń jaq qabyrǵasynyń asty tartyp aýyrǵan. Biraq últradybystyq zertteý men magnıtti-rezonanstyq tomografıa ótte tas joq degen qorytyndy shyǵaryp bergen. Keıin ota barysynda ót qabynyń kóp mólsherde usaq tas pen qumǵa tolyp qalǵany anyqtalǵan.
Dárigerler oǵan «jiti pankreatıt, oseptıkalyq formadaǵy aýyr pankreonekroz» degen dıagnoz qoıdy. Konsılıýmda tolyq tekserip shyqqannan keıin ota jasaý týraly sheshim qabyldandy. MÁMS sheńberinde jasalǵan laparoskopıalyq ota barysynda ót qaby alynyp tastaldy. Dárigerlerdiń aıtýynsha, usaq tastar ót jolyna baılanyp, pankreatıtke uqsas sımptomdar bergen kórinedi.
«Kóptegen adamdar ótinde usaq tastar baryn bile tura emdelmeıdi, operasıa jasatýǵa júreksinip, aýrýǵa shydap júre beredi. Sodan soń osylaı derti asqynyp, aýyr jaǵdaıda ustamamen aýrýhanaǵa túsedi. Biraq bul pasıenttiń ótinde tas bary qansha tekserse de bilinbegen. Sebebi óte usaq tastardy ÝDZ men MRT/KT apparattary kórsetpeıdi. Ót qabyn kesip alǵan kezde ishinen qum men júzdegen usaq tas tógildi. Bir jyl ishinde 4 ret asqynyp, oń jaq qabyrǵasynyń asty qatty tartyp aýyrǵan. Osynyń bárine sebep bolǵan ót qabyn alyp tastadyq, sońǵy eki aıda aýrý belgileri qaıtalanbady», — deıdi №7 Qalalyq klınıkalyq aýrýhananyń 2-hırýrgıa bólimshesi meńgerýshisi Musa Sahıpov.
Bilikti mamandardyń sheberliginiń arqasynda operasıa sátti ótti. Qazir naýqas aýrýhanadan shyqty, jaǵdaıy jaqsy. Profesor Musa Sahıpov mundaı jaǵdaılardy boldyrmas úshin aýrý belgileri baıqalǵan sátte birden dárigerler kómegine júginý qajettigin eskertti.