Júrgizýshiler «Altyn Orda» bazary mańyndaǵy jańa kópirdiń jaǵdaıyna shaǵymdandy, dep habarlaıdy Almaty-akshamy.kz Inform.kz-ke silteme jasap.
Áleýmettik jelide júrgizýshilerdiń biri «Altyn Orda» mańyndaǵy jolaıryqtyń sapasyn kórsetken vıdeosyn jarıalady. Beınejazbadan shuńqyr men kedir-budyr joldy baıqaýǵa bolady. «QazAvtoJol» ulttyq kompanıasy «Altyn-Orda» bazary mańyndaǵy Almaty-Bishkek tas jolynyń Raıymbek-Almaty ýchaskesindegi kúrdeli jóndeý jumystary áli jalǵasyp jatqanyn málim etti.
«Bıyl bul nysanda qalǵan jumystar júrgizilip jatyr. Olardyń ishinde: qıyrshyqtas-mastıka asfáltbeton jabynynyń ústińgi qabatyn jabý,jaıaý júrginshiler ótkelderinde polıgal shatyrdy jáne lıftilerdi ornatý, temirbeton jáne tosqaýyl qorshaýlaryn boıaý, sondaı-aq jol belgilerin qoıý. Nysandaǵy jumystardy tolyq aıaqtaý 2022 jylǵa josparlanǵan», - dep habarlady «QazAvtoJol» kompanıasynyń baspasóz qyzmeti.
Sonymen qatar, kompanıa ókilderi jaqynda qurylysshylar joldyń ekinshi, negizgi qabatyn tóseıtinin aıtty.
«Bul rette, qıyrshyqtasty-mastıka asfáltbetonnyń sońǵy ústińgi qabatyn montajdaý boıynsha bul ýchaskeler tutas bolýy úshin tómengi qabat frezerlenip, qaıta asfáltbeton tóseledi», - dep atap ótti kompanıadaǵylar.
Eske salaıyq, «Altyn Orda» bazarynyń janyndaǵy estakada byltyr jeltoqsan aıynda ashylǵan bolatyn.