Áleýmettik tólemderdiń 9 túrin resimdeýge múmkindik beredi.
«Otbasynyń sıfrlyq kartasy» aqparattyq júıesin pılottyq rejımde engizýdiń arqasynda osy jyldyń 1 qyrkúıeginen bastap 20 myń adamǵa memlekettik kórsetilgen qyzmetter belsendi kórsetilýi úshin SMS joldandy. Bul rette ótinish berýsiz járdemaqy nemese tólem alý múmkindigin 5,5 myń adam nemese 29,4% paıdalandy, dep habarlaıdy Almaty-akshamy.kz.
"Qazirgi ýaqytta Otbasynyń sıfrlyq kartasy memlekettik qoldaý sharalaryn alýǵa quqyǵy bar qazaqstandyqtarǵa qandaı da bir ótinishtersiz járdemaqylar men áleýmettik tólemderdiń 9 túrin resimdeýge múmkindik beredi. Olar júktilikke jáne bosanýǵa baılanysty tabysynan aıyrylǵan jaǵdaıda tólenetin áleýmettik tólem, bala kútimine baılanysty tabysynan aıyrylǵan jaǵdaıda tólenetin áleýmettik tólem, jumysynan aıyrylǵan jaǵdaıda tólenetin áleýmettik tólem, asyraýshysynan aıyrylý boıynsha áleýmettik tólem, múgedektigi bar balany tárbıelep otyrǵan ata-anasyna (qamqorshysyna) járdemaqy, múgedektigi boıynsha járdemaqy, kóp balaly otbasylarǵa beriletin járdemaqy, «Altyn alqa» jáne «Kúmis alqa» alqalarymen marapattalǵan kóp balaly analarǵa beriletin járdemaqy, ataýly áleýmettik kómek", - delingen Eńbekmıni baspasóz qyzmetiniń habarlamasynda.
Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. Ótinishti resimdeý jáne áleýmettik járdemaqy nemese tólem taǵaıyndaý avtomatty rejımde júrgiziledi, sodan keıin aqsha qarajaty alýshynyń bank shotyna aýdarylady.
Proaktıvti formattaǵy memlekettik qoldaý sharalary Otbasynyń sıfrlyq kartasy arqyly 5,5 myń azamatqa taǵaıyndaldy.
Buryn habarlanǵandaı, Otbasynyń sıfrlyq kartasy – bul ártúrli memlekettik organdardyń málimetterin jınaqtaıtyn, azamattardyń áleýmettik ál-aýqatynyń deńgeıin anyqtaýǵa jáne olarǵa proaktıvti formatta kepildendirilgen memlekettik qoldaý kórsetýge múmkindik beretin aqparattyq júıe.
Búgingi tańda memlekettik organdardyń aqparattyq júıeleriniń derekteri negizinde Otbasynyń sıfrlyq kartasynda Qazaqstannyń 19,5 mln azamaty nemese 6,3 mln otbasy týraly aqparat jınaqtalǵan.
Jobany iske asyrý kezeńderi:
- osy jyldyń 1 qyrkúıeginen bastap járdemaqylar men áleýmettik tólemderdiń 9 túri boıynsha jańa formatta qyzmet alýǵa múmkindik berildi;
- 2023 jylǵy 1 qańtardan bastap tizbe áleýmettik qorǵaý salasyndaǵy qyzmettermen keńeıtiletin bolady;
- 2024 jylǵy 1 qańtardan bastap densaýlyq saqtaý jáne bilim berý salalaryndaǵy memlekettik kepildikter engiziletin bolady;
- 2025 jyldan bastap memlekettik kepildikterdiń barlyq túrleri qamtylatyn bolady.
Alaıaqtyqtyń aldyn alý maqsatynda 1414 biryńǵaı baılanys ortalyǵynan kelip túsken SMS-ke jaýap berý qajettigin atap ótemiz.
Barlyq suraqtar jóninde 1414 nómiri boıynsha Call-ortalyqqa habarlasyńyz. Qońyraý shalý tegin.