Kartada 19,4 mln azamat týraly derek jınaqtalǵan.
1 qyrkúıekten bastap Áleýmettik kodeks jobasy aıasynda Otbasynyń sıfrlyq kartasy pılottyq rejımde iske qosylady, dep habarlaıdy Almaty-akshamy.kz
Aqparattyq júıe azamattarǵa proaktıvti formatta, ıaǵnı alýshynyń ótinishin kútpeı kómek kórsetýdi kózdeıdi, bul sybaılas jemqorlyq táýekelderin tómendetip, memlekettik qyzmetterdiń sapasyn jaqsartýǵa múmkindik beredi
Erteń, 1 qyrkúıekten bastap Áleýmettik kodeks jobasy aıasynda Otbasynyń sıfrlyq kartasy pılottyq rejımde iske qosylady.
Otbasynyń sıfrlyq kartasy – bul ártúrli memlekettik organdardan alynǵan málimetterdi jınaqtaıtyn, azamattardyń áleýmettik ál-aýqatynyń deńgeıin aıqyndaýǵa jáne olarǵa proaktıvti formatta kepildik berilgen memlekettik qoldaý kórsetýge múmkindik beretin aqparattyq júıe.
Eńbek jáne halyqty áleýmettik qorǵaý mınıstrliginiń aqparatynsha, sıfrlyq kartada 6 mln otbasyna bólingen 19,4 mln azamat týraly derekter jınaqtalǵan.
Otbasylardyń ál-aýqaty 5 krıterıı boıynsha aıqyndalady:
ekonomıkalyq ómir súrý jaǵdaıy,
densaýlyq saqtaý qyzmetterimen qamtý jáne múgedektigi bar adamdardyń bolýy,
turǵyn úı jaǵdaılary,
áleýmettik jaǵdaılar,
bilim berý qyzmetterimen qamtý jáne otbasy músheleriniń bilim deńgeıi.
Otbasynyń sıfrlyq kartasynyń jumys isteý algorıtmi bylaı: memlekettik qoldaý sharalaryn alýǵa quqyq belgilengen kezde, áleýetti alýshyǵa memlekettik qyzmet kórsetýge kelisim alý úshin SMS-habarlama jiberiledi. Kelisim alǵannan keıin áleýmettik járdemaqy, tólem nemese memlekettik qoldaýdyń ózge de túri taǵaıyndalyp, aqsha kómek alýshynyń bank shotyna aýdarylady.
Jobany iske asyrý kezeńderi:
osy jylǵy 1 qyrkúıekten bastap járdemaqylar men áleýmettik tólemderdiń 9 túri boıynsha jańa formatta qyzmetter alý múmkindigi usynyldy;
2023 jylǵy 1 qańtardan bastap tizim áleýmettik qorǵaý salasyndaǵy qyzmettermen keńeıtiledi;
2024 jylǵy 1 qańtardan bastap densaýlyq saqtaý jáne bilim berý salalaryndaǵy memlekettik kepildikter engiziledi;
2025 jyldan bastap memlekettik kepildikterdiń barlyq túri qamtylady.
Otbasynyń sıfrlyq kartasyn pılottyq rejımde iske qosýǵa daıyndyq barysynda Eńbek mınıstrligi jelisi boıynsha memlekettik qyzmetterge muqtaj azamattar anyqtaldy. Al 1 qyrkúıekten bastap olarǵa proaktıvti qyzmet kórsetý úshin SMS-habarlama jiberiledi.