Álemdi jaıaý aralaýǵa shyqqan ulytaýlyq aqsaqal Reseı shekarasyna jetti
Sársenbaı qarıa jer jahandy jaıaý aralamaq. Ulytaý oblysynda turatyn 73 jastaǵy saıahatshy Sársenbaı Qotyrashovtyń 2 tamyzda Atyraýdan jolǵa shyqqan edi, dep habarlaıdy Almaty-akshamy.kz.
QazAqparattyń jazýynsha, saıahatshy búgin, 8 tamyzda Qazaqstan-Reseı shekarasyna jetti. Bul týraly saıahatshy óziniń áleýmettik jelidegi paraqshasynda bólisti.
«Mine, shekaraǵa jettim. Birinshi shekaradan ótkeli turmyn. Atyraýdan 300 shaqyrymnan astam jaıaý júrdim. Joldyń keıbir jeri nashar, keıbir tusy jaqsy. Jol salynyp jatyr. Kelesi jylǵa deıin bitetin shyǵar. Búgin mine, birinshi ret shekarany kórip, qobaljyp turmyn. Alla sátin salsa, ótermin, saý bolyńyzdar, qazaqstandyqtar», - dedi Sársenbaı Qotyrashov.
Egde jastaǵy saıahatshy Sársenbaı Qotyrashov álemdi jaıaý aralaý saparyna shyǵar aldynda atyraýlyq jastarmen kezdesti.
«Meniń jaıaý saparym álemniń birneshe elin qamtıdy. Qazaqstannan jolǵa shyǵyp, Reseı, Grýzıa, Túrkıa, Bolgarıa, Serbıa, Vengrıa, Avstrıa, Germanıa, Fransıa, AQSH, Qytaı, Mońǵolıa elderine baramyn. Keıin Reseı arqyly Qazaqstanǵa oralýdy kózdep otyrmyn. Jaıaý saparym 2 jylǵa sozylyp, 2025 jyldyń tamyzynda aıaqtaımyn degen josparym bar», - deıdi Sársenbaı Qotyrashov.
Sársenbaı Qotyrashov jaıaý saparyn birneshe baǵytqa bólgen. Alǵashqy marshrýty – Qazaqstan, Reseı, Grýzıa, Túrkıa elderine barý. Bul elderdi aralaý úshin 3 myń shaqyrymǵa jýyq jol júredi. Buǵan 100 kún qajet.
Ekinshi baǵyttaǵy Túrkıa, Fransıa, AQSH elderin 180 kúnde aralaýdy josparlap otyr. Bul úshin 9 myń shaqyrymnan astam joldy eńsermek.
Úshinshi kezeńe AQSH-tan bastap, Qytaı, Mońǵolıa, Reseı arqyly Qazaqstanǵa oralady. Bul kezeńde 130 kúnde 4 myń shaqyrymnan astam jol júredi. Ol eki jylda 16 210 shaqyrymdy baǵyndyrmaq.