Slovenıada táýlik ishinde bir aılyq jaýyn-shashyn mólsheri tústi
Tolassyz jaýǵan nóserden bolǵan sý tasqynynan kem degende 4 adam qaza tapty. Zalal kólemi 500 mln eýroǵa baǵalanyp otyr, dep habarlaıdy Almaty-akshamy.kz QazAqparatqa silteme jasap.
Ońtústik Eýropada ornalasqan atalǵan elde bir táýlikte aılyq jaýyn-shashyn mólsheri jaýdy. Memleket aýmaǵynyń úshten eki bóligi tabıǵı apattan zardap shekti. Kóptegen ǵımaratty sý basty. Ondaǵan myń úı jaryqsyz qaldy.
Slovenıa premer-mınıstri Robert Golobtyń aıtýynsha, «zaqym kólemi aýqymdy, sebebi Slovenıanyń úshten eki bóligi zardap shekti. Qalypty ómirge qaıta oralý úshin kóp kúsh kerek».
Myńdaǵan adam evakýasıalanýǵa májbúr boldy, kóptegen turǵyndy tikushaqtar nemese jedel qyzmet mamandary qaıyqtyń kómegimen qutqardy.
Eýropalyq komısıa tóraǵasy Ýrsýla fon der Láıen Slovenıaǵa EO tarapynan kómektesýge ýáde berdi. Slovenıa úkimeti NATO-ǵa kómek surap júgindi: áskerı tikushaqtar men jınalmaly kópirler jiberýdi ótindi.