Uıymdasqan qylmystyq top quramynda esirtki bar ósimdikterdi Almatyda men oǵan jaqyn aýdandarda ósirýdi jáne ótkizýdi jolǵa qoıǵan.
İİM esirtki qylmysyna qarsy is-qımyl departamenti men Almaty qalasynyń polısıa departamenti jyldam qımyldaıtyn jáne “Arlan” arnaıy jasaqtaryn tarta otyryp, qalalyq UQKD-men birlesip, prokýratýra organdarynyń úılestirýimen marıhýana men gashıshti asa iri mólsherde ósirýmen jáne ótkizýmen aınalysqan qylmystyq toptyń áreketin toqtatty, dep habarlaıdy Almaty-akshamy.kz Polisia.kz-ke silteme jasap.
Qylmystyq áreketterdi baqylaý jáne tirkeý polıseıler úshin qıynǵa soqty. Sebebi esirtki tekserýden ótken tapsyrys berýshilerge ǵana jetkizilgen.
Arnaıy qurylǵan jedel-tergeý toptary Almaty qalasy men Almaty oblysynyń aýmaǵynda 14 adamdy ustady. Bir ýaqytta qyzmettik-izdestirý ıtterin tarta otyryp, tintý júrgizildi. Ár úıde esirtki zattary tabylyp, tárkilendi. Almaty oblysynyń Báıterek ketinde ustalǵandardyń birine tıesili jeke úıdi tintý kezinde quramynda esirtki bar ósimdikterdi ósirýge arnalǵan jaryqdıodty shamdar ornatylǵan qosalqy úı-jaı tabyldy. 32 qarasora butasy tárkilendi. Ekinshi zerthana Almatydaǵy jeke úıdiń jertólesinde anyqtaldy. Ol jerden quramynda esirtki bar qarasora butalary, tuqymdar, keptirilgen marıhýana salynǵan oramalar jáne ósimdikterdi ósirýge arnalǵan jabdyqtar tárkilendi. Ustalǵan sátte qylmystyq toptyń músheleriniń barlyǵy esirtkilik masań kúıde bolǵan. Operasıa nátıjesinde zańsyz aınalymnan 40 keliden astam esirtki zattary tárkilendi. Qylmystyq iske zattaı dálel retinde tárkilengen qarasora tuqymy, ony ósirýge arnalǵan jabdyq, ulttyq jáne shetel valútasyndaǵy qarajat, qylmysqa paıdalanylǵan uıaly telefondar da qosa tirkeldi.
«Esirtki bıznesine qatysýshylar esirtkini ósirý men zańsyz aınalymynan basqa QR QK-niń 262-baby “Uıymdasqan top, qylmystyq uıym qurý jáne olarǵa basshylyq etý, sol sıaqty olarǵa qatysý” boıynsha tergeletin bolady. Jaza múlki tárkilenip, on eki jylǵa deıin bas bostandyǵynan aıyrýdy kózdeıdi», - dep habarlady İİM.
Polısıa esirtki zattaryna baılanysty kez-kelgen is-áreket úshin qylmystyq jaýapkershilik bar ekenin eskertedi. Eger sizge “ońaı tabys tabý” týraly usynys tússe nemese qylmystyń kýási bolsańyz, 102 arnasyna dereý habarlaýdy suraımyz.