Balany baqshadan shyǵarýǵa esh negiz joq
Alty jasqa tolǵan balany balabaqshadan shyǵarý týraly zańda eshqandaı norma joq. Bul týraly Oqý-aǵartý mınıstrliginiń jedel keńesinde aıtyldy, dep habarlaıdy Almaty-akshamy.kz Zakon.kz-ke silteme jasap.
Mınıstr Asqat Aımaǵambetov ótken aptada balabaqshalarǵa qatysty másele kóterilgenin aıtty. Onda alty jasqa tolǵan búldirshinder topty resmı bitirýine deıin balabaqshadan shyǵarylady degen aqparat aıtylyp jatyr.
Oqý-aǵartý mınıstrligi Mektepke deıingi bilim departamentiniń dırektory Natalá Jumadildaevanyń aıtýynsha, alty jasqa tolǵan balany balabaqshadan shyǵarýǵa zańdy negiz joq.
"Qazaqstan Respýblıkasyndaǵy bilim týraly" zańnyń 30-babynda mektepke deıingi tárbıe men oqytý mektep tabaldyryǵyn attaǵanǵa deıin bolady dep kórsetilgen. Bul norma úsh buıryqta jáne memlekettik bilim berý standartynda bar. Barlyq norma túzetilgen. Zańda "Mektepke deıingi tárbıe men oqytý mektep tabaldyryǵyn attaǵanǵa deıin júzege asyrylady" delingendikten, alty jastan keıin balany baqshadan shyǵarýǵa esh negiz joq", - deıdi Natalá Jumadildaeva.
Ol buryn jelide paıda bolǵan osyndaı faktiler týraly aqparat shyndyqqa janaspaıtynyn aıtty. Osy oraıda Oqý-aǵartý mınıstri bul másele boıynsha jan-jaqty túsinikteme berýge keńes berdi.
"Eger mundaı faktiler bolsa, Oqý-aǵartý mınıstrligine habarlasyńyz. Biraq shartty túrde eger bala qańtarda alty jasqa tolsa, oqýdan shyǵarýǵa bolmaıdy degen norma anyq bekitilgen. Bul degenimiz tamyz aıyna deıin mindetti, ıaǵnı tıisti baǵdarlamany meńgergenge deıin bala balabaqshada bolady degen sóz. Osyndaı faktiler boıynsha rastalmaǵan aqparat taraǵan kezde dereý aqparat berý qajet. Al keıbir uıym qabyldanǵan normalarǵa qaıshy keletin sheshim qabyldasa, onda qatań sharalar qabyldanýy kerek", - dedi Asqat Aımaǵambetov.
1 qarashada Qazaqstan balabaqshalarǵa biryńǵaı kezek engizýdi kózdep otyrǵany habarlanǵan edi.