Biliktilik normatıvterine qaraı jeńimpazdarǵa «Qazaqstan Respýblıkasynyń sport sheberi» ataǵy beriledi.
Astanadaǵy Jaqsylyq Úshkempirov atyndaǵy Jekpe-jek saraıynda ótip jatqan respýblıkalyq dodaǵa Qarýly Kúshterdiń jáne kúshtik qurylymdardyń sportshylary qatysyp jatyr, dep habarlaıdy Almaty-akshamy.kz.
Týrnırdiń ashylý saltanatyna Parlament depýtattary, mınıstrlikter men ózge de quzyrly mekemeler ókilderi, Qarýly Kúshterdiń ardagerleri qatysty.
– Memleket basshysy turǵyndardyń barlyq jas sanatynda buqaralyq sportty damytýǵa, ult densaýlyǵyn nyǵaıtý máselesine erekshe nazar aýdaryp keledi. Bul turǵyda qoıan-qoltyq urystyń barlyq kúshtik qurylymdarda damyp jatqanyn aıta ketken jón. Ol áskerı qyzmetshilerdi shymyr etip qana qoımaı, tózimdilikke, myqtylyqqa úıretedi. Barlyq qatysýshylarǵa sáttilik, tartysty báseke, myqty komandalyq rýh tileımin. Shyn myqtylar jeńiske jetsin!, – dedi týrnırdiń ashylý saltanatynda Qorǵanys mınıstri, general-polkovnık Rýslan Jaqsylyqov.
Jarysty Qorǵanys mınıstrliginiń Ortalyq sport klýby, Mádenıet jáne sport mınıstrliginiń Sport jáne dene shynyqtyrý isteri komıteti jáne Búkilqazaqstandyq qoıan-qoltyq urys qaýymdastyǵy qoldaýymen uıymdastyryp otyr.
Qorǵanys mınıstriniń kýbogynda elimizdiń barlyq kúshtik qurylymdarynyń 15 komandasy, 160-tan astam sportshysy qatysyp, baǵyn synaıdy. Erler segiz, áıelder úsh salmaq dárejesinde óner kórsetedi.
Týrnırdiń jeńimpazdary men júldegerleri jeke jáne komandalyq esepte aıqyndalady. Sondaı-aq «Úzdik tehnıkasy úshin» jáne «Jeńiske degen jigeri úshin» jekeleı atalymdary boıynsha da arnaıy marapattar kózdelgen.
Biliktilik normatıvterine qaraı jeńimpazdarǵa «Qazaqstan Respýblıkasynyń Sport sheberi» ataǵy beriledi.
Qazaqstannyń Qarýly kúshterinde qoıan-qoltyq urys áskerı qyzmetshilerdiń dene shynyqtyrý daıarlyǵy baǵdarlamasynyń mańyzdy bóligi ekenin aıta ketý kerek. Ony áskerlerde jáne óskeleń urpaq arasynda keńinen nasıhattaýǵa qorǵanys vedomstvosynyń basshylyǵy tarapynan da jiti nazar aýdarylyp otyr.