Gıdrometeorologıalyq qyzmettiń boljamyna sáıkes, túnde syrtqy aýa temperatýrasynyń + 2 gradýsqa deıin tómendep, jaýyn-shashyn túsedi, bul turǵyn úı-jaılardyń salqyndaýǵa ákeledi, dep habarlaıdy almaty-akshamy.kz.
Esterińizge sala keteıik, megapolıste 10 qazanda balabaqshalar, mektepter men aýrýhanalar jylýǵa birtindep qosylyp, jylytý maýsymy bastaldy. Almaty qalasynyń ákimi Erbolat Dosaev sanaty boıynsha nysandardy kezeń-kezeńimen qosý úshin tıisti qaýlyǵa qol qoıdy. Áleýmettik nysandardan keıin aldaǵy demalys kúnderi turǵyn úıler men ákimshilik ǵımarattarǵa jylý kezeń-kezeńimen beriledi. Qazir jylý jelileriniń aınalymy (qubyrlardy jylytý) boıynsha jumystar júrgizilip otyr.
Almatyda barlyǵy 214 mektep, 190 balabaqsha, 128 aýrýhana jáne 8836 kóppáterli turǵyn úı ortalyq jylytýǵa qosylady.
Energetıka jáne sýmen jabdyqtaý basqarmasynyń málimetinshe, qalalyq jeliler men jylýmen jabdyqtaý júıeleri 100% daıyn. Osy jyldyń jylýaralyq kezeńinde Almatyda 17 km astam jylýmen jabdyqtaý jelileri, 120 km elektrmen jabdyqtaý, 43 km sýmen jabdyqtaý, 29 km gazben jabdyqtaý qaıta jańartylyp, jóndelýde.
Aıta keteıik, tutynýshylardy jylýmen jabdyqtaý myna retpen júzege asyrylady:
- balalar, emdeý, mektep mekemeleri, kásiptik mektepter, medısınalyq-áleýmettik mekemeler:
- turǵyn úıler, jataqhanalar, qonaq úıler;
- ákimshilik ǵımarattar, oqý oryndary, teatrlar jáne t.b.