Dúken Másimhanulynyń mereıtoıy atalyp ótti
Búgin, 12 qazan kúni Almatyda qytaıtanýshy-ǵalym, belgili aqyn ári aýdarmashy, ulaǵatty ustaz, qoǵam qaıratkeri, f.ǵ.d., profesor Dúken Másimhanulynyń 60 jasqa tolýyna oraı halyqaralyq ǵylymı-konferensıa ótti. Ǵalymnyń shyǵystaný, qytaıtaný, kórkem aýdarma jáne ádebıet salasyndaǵy eńbekterin qamtyǵan bes kitabynyń tusaýy kesilip, oqyrmandarǵa jol tartty.
Ulttyq kitaphananyń jıyn zalynda bastalǵan sharaǵa elimizden jáne alys-jýyq shetelden shyǵystanýshy, tarıhshy-ǵalymdar, sóz zergerleri aqyn-jazýshylar, qoǵam qaıratkerleri men zıaly qaýym ókilderi, sondaı-aq, dıplomattar qatysty.
D.Másimhanulynyń 60 jas týǵan kúnine arnalǵan ataýly sharada qara shańyraq Qazazaq Ulttyq ýnıversıtetinen tartyp elimizdegi qabyrǵaly bilim ordalarynyń, túrli ınıstıtýttardyń arnaıy ókilderi quttyqtaýlaryn jetkizip, syı-sıapattary tabystady. Halyqaralyq TÚRKSOI uıymy arnaıy qurmet medalin, Eýrazıa Ulttyq ýnıversıteti «Kúltegin» medaldaryn taqty.
Aýqymdy sharada Almaty qalasy ákimdiginen tartyp, ár dárejeli resmı oryndarynyń quttyqtaýlary oqyldy. Sonymen birge, Iran Islam Repýblıkasynyń, Qyrǵyz Respýblıkasynyń jáne Vengrıanyń Qazaqstandaǵy elshilikteri, dıplomattary ǵalymdy mereıtoıymen quttyqtady.
Sharanyń alǵashqy otyrysynda D.Másimhanulynyń «Shyǵys álemi: Ańyz ben shyndyq» ǵylymı zertteýler jınaǵy; «Qytaı qalamgerleriniń tańdamaly shyǵarmalary» dep atalatyn (5 tomdyq) kórkem aýdarmalar jınaǵy; «Júregimniń jumbaǵy» atty jyr jınaǵy, sondaı-aq, «Ult pen rýh» ǵylymı zertteýler, ádebı portretter jınaǵy qatarly avtorlyq tórt eńbegimen qosa, «Ǵalym. Ustaz. Aqyn. Aýdarmashy. Azamat» atty D. Másimhanuly týraly maqalalardyń jınaǵynyń da tusaýy kesilip, oqyrmanǵa jol tartty.
Qytaıtanýshy-ǵalym, ári ulaǵatty ustazdyń ataýly mereıtoıyna oraı ótken shara túsen keıin «Qazaqstan jáne Shyǵys elderi: tarıhı-mádenı hám saıası yntymaqtastyqtyń jańa qyrlary» atty halyqaralyq ǵylymı-tájirıbelik konferensıaǵa ulasty. Onda qazirgi kezeńdegi otandyq shyǵystaný ǵylymynyń damý baǵyttary talqylandy. Oǵan qosa Dúken Másimhanulynyń ómiri men ǵylymı shyǵarmashylyǵy, onyń otandyq shyǵystaný ǵylymyna qosqan úlesine qatysty áńgime órbitildi.
