Ázirge mobıldi patrúlder synaq túrinde qalanyń Medeý aýdanynda ǵana jumys istep júr.
Bolashaqta shahardyń barlyq saıabaǵyn samokatpen patrúldeıtin ushqyr toptardy jasaqtaý jospary bar. Qazir polısıa qyzmetkerleri birneshe jaıaý júrginshiler aýmaǵyndaǵy tártipti qadaǵalap, turǵyndarǵa elektr kóligimen júrýdiń erejesin túsindirip jatyr, dep habarlaıdy Almaty-akshamy.kz 24.kz-ke silteme jasap.
Jańa zań qoldanysqa engen soń elektr samokatyn paıdalanýshylar velosıped joldarymen jáne jol jıegimen eshbir shekteýsiz júre alady. Al jaıaý júrginshi jolyna tússeńiz jyldamdyqty saǵatyna 6 shaqyrymnan asyrmaý qajet. Eki dóńgelikti kólikke mingen mobıldi toptar ázirge Medeý aýdanyndaǵy Terenkýr saıabaǵyndaǵy tártipti baqylaýda. Polısıa ókilderi bul mańaıdy jaıaý patrúldeý qıyn bolǵanyn aıtady. Sebebi, tártip buzǵandar jeldeı júıtkip samokatpen ustatpaı ketedi eken.
«Bastalǵaly beri bizde kúnine kezekshilikke úsh qyzmetker túsedi. Úsh qyzmetker tańǵy saǵat 9-dan keshki saǵat 4-ke deıin júredi. Árıne tártip buzatyndar óte kóp. Ásirese jastarymyz, stýdentter. Solarǵa eskertip jol shetimen júrý jóninde túsindirý jumystary júrgizilip jatyr. Tájirıbe qar túskenge deıin jalǵasady. Oń nátıje berse mundaı patrúlder qalanyń barlyq aýdandarynda jumys isteıdi», -deıdi Medeý APB jergilikti polısıa bastyǵy Ádilbek Qazybek.
Bul bastamany qala turǵyndaryda quptap otyr.
«Mundaı patrúldiń jumysyn qoldaımyn. Sebebi mashınamen júrip saıabaq, ózen jaǵasyn baqylaý qıyn. Al balalardyń samokatty qatty tebetini jasyryn emes. Jastar qaýipsizdikke mán bermeıdi», - deıdi qala turǵyny Nazarbaek Nálibaev.
Tártip buzǵan elektr samokatyn mingen azamattarǵa 7 myń teńgege deıin aıyppul salynýy múmkin. Ákimshilik kodekstiń 615-babymen osyndaı jaýapkershilik kózdelgen. Eger ózge kólikpen soqtyǵysyp nemese adam qaqsa samokat júrgizýshisi budan 5 ese kóp aıyppul tóleıdi. Jyl basynan beri Almatyda samokat mingenderdiń qatysýymen 18 jol-kólik oqıǵasy tirkelgen. Ókinishke oraı bireýi adam ólimimen aıaqtalǵan.