Almaty ákimi Panfılov kóshesinen bastap bos jatqan aýmaqtaǵy jańa skverge deıin Almaly aýdanyndaǵy jańartylǵan aımaqtardy aralap kórdi, dep habarlaıdy aqshamnews.kz
Panfılov jaıaý júrginshiler kóshesi jańa keıipke endi. Bıyl qyrkúıek aıynda Panfılov kóshesiniń Qabanbaı batyr kóshesinen Jibek Joly kóshesine deıingi aralyǵynda jóndeý jumystary bastaldy. Bul jumys keıbir jerlerde trotýar plıtalarynyń jarylyp, oryndyqtardyń, sýarý júıesiniń jáne basqa da kóriktendirý elementteriniń jaramsyz bolýyna baılanysty qolǵa alynǵan.
Almaly aýdanyna jumys sapary kezinde megapolıs ákimi Erbolat Dosaev bul kósheniń qala turǵyndary men qonaqtarynyń súıikti orny ekenin atady. Sol sebepti jóndeý barysynda estetıkalyq jáne praktıkalyq turǵydan árbir bólshekke erekshe nazar aýdarylǵan.
Búgingi tańda aýdan ákimdigi 2000 sharshy metr trotýar plıtalaryn aýystyryp, 130 oryndyq ornatty, 2 balalar alańy salyndy, 2,6 km jaryqtandyrý kabelderi aýystyrylyp, 2 qurǵaq sýburqaq jóndeldi. Sonymen qatar, kógaldandyrýǵa jáne jasyl aımaqtar qurýǵa erekshe kóńil bólindi. Jasyl aımaq kólemi 20%-ǵa ulǵaıtyldy.
«Bul aýmaqty japon spıreıasy, shyǵys gúli jáne basqa da ósimdikterden turatyn 13 myńnan astam butalar men kópjyldyq gúlder kórkeıtedi. Biz 39 jańa aǵash ektik, onyń ishinde usaq japyraqty jóke, sándik alma jáne almurt aǵashtary bar. Egilgen kógaldy sýyqtan jáne qustardan qorǵaý úshin ony kakao qabyǵymen japtyq. Bul qabyq tyńaıtqysh retinde qoldanylady jáne jaǵymdy ıis shyǵarady», - dedi merdiger uıym ókili Margarıta Balakıreva.
Jańartýdan keıin keńistik erekshe kórikke ıe bolyp, qala turǵyndaryna jaǵymdy emosıa syılady.
«Aıyrmashylyq birden baıqalady. Trotýar tegis bolǵandyqtan, júrip-turý áldeqaıda yńǵaıly boldy, al kóshe odan saıyn jaıly bola tústi. Mamandar jaıaý júrginshiler aımaǵy kez kelgen mezgilde ádemi kórinýi úshin bar kúshin salǵan», - dedi qala turǵyny.
Aýdan turǵyny Alına Kýznesova jańa qondyrǵylar men balalar alańshalarynyń paıda bolǵanyna erekshe qýanǵanyn aıtty.
«Biz munda kúnde derlik serýendeımiz. Súıikti sýburqaqtarymyzdy jóndegeni qýantady. Jalpy, bári keremet jasalǵan, kóshe odan saıyn ádemilene tústi», - dedi ol.
Erbolat Dosaev sapar barysynda Rozybakıev pen Dúısenov kósheleriniń qıylysynda «Halyq qatysatyn búdjet» baǵdarlamasy aıasynda salynǵan jańa skverge de at basyn burdy.
Buryn 0,49 gektar aýmaq kásipkerge ýaqytsha jalǵa berilgen bolatyn. Alaıda jer maqsatyna saı paıdalanylmaǵandyqtan, ol jerde stıhıalyq bazar paıda bolyp, jaqyn mańdaǵy úılerdiń turǵyndaryna qolaısyzdyq týǵyzdy.
Endi bul aýmaqta jaıaý júrginshiler joldary salyndy, oryndyqtar, qoqys jáshikteri, rezeńke jabyny bar balalar men jasóspirimderge arnalǵan oıyn alańdary ornatyldy. Sondaı-aq jaryqtandyrý júıesi júrgizildi, avtomatty sýarý júıesi, kógal jáne 3585 kópjyldyq buta egildi.
«Buryn tańnan bastap tereze aldynan kólikterdiń shýyldaǵan daýysy estiletin. Jazda túrli jaǵymsyz ıisterge baılanysty terezeni ashý múmkin emes edi. Ákimdik jabaıy saýdany rettep qana qoımaı, bul jerdi kóriktendirdi. Bul joba bizdiń aýdannyń sánine aınaldy, al turǵyndar, ásirese balalar, bos ýaqytyn osynda ótkizip júr», - dedi turǵyndardyń biri aǵynan jarylyp.
Erbolat Dosaev qala turǵyndarymen kezdesýde shaharda demalý men sportpen aınalysýǵa arnalǵan qaýipsiz ári jasyl qoǵamdyq oryndardy qurý jumystary jalǵasa beretinin jetkizdi.
Aıta ketý kerek, «Halyq qatysatyn búdjet» baǵdarlamasyna bıyl 18,8 mıllıard teńge bólindi, bul ótken jylmen salystyrǵanda 5,8 mıllıard teńgege kóp. Almaty turǵyndary aýlalardy, qoǵamdyq oryndardy kóriktendirý, sport jáne oıyn alańdaryn salý boıynsha 364 jobany usyný jáne júzege asyrý múmkindigine ıe boldy.