Megapolıste Almaty Azamattyq Alánsynyń uıymdastyrýymen "Turaqty damý maqsattaryn júzege asyrýdyń qoǵamdyq monıtorıń ortalyǵyn qurý" jobasy boıynsha eseptik kezdesý ótti, dep habarlaıdy aqshamnews.kz
Oǵan memlekettik organdardyń ókilderi, ÚEU basshylary, qoǵam qaıratkerleri jáne BAQ ókilderi qatysty.
Kezdesýdiń maqsaty – Almaty qalasynda Turaqty damý maqsattaryn (TDM) iske asyrý boıynsha júrgizilgen jumystardyń qorytyndysyn talqylaý jáne jobanyń jetistikterimen tanysý boldy.
İs-shara barysynda Almaty Azamattyq Alánsynyń tóraǵasy, Qoǵamdyq keńestiń múshesi Qaıyrjan Ábdihalyqov qatysýshylarǵa kirispe sóz sóılep, bul jobanyń Almaty qalasynda azamattyq qoǵamdy damytýǵa qosqan úlesin atap ótti. Ol Turaqty damý maqsattarynyń mańyzdy ekenin jáne osyndaı jobalardyń qoǵamdy damytýdaǵy rólin erekshe atap kórsetti.
Bul kezdesýde Almaty qalasyndaǵy azamattyq qoǵam uıymdarynyń Turaqty damý maqsattary kórsetkishterin oryndaýdaǵy jetistikteri ǵana emes, sonymen qatar aldaǵy ýaqytta sheshýdi qajet etetin máseleler de talqylandy.
Kezdesý qorytyndysynda qatysýshylar Turaqty damý maqsattary boıynsha jumystardy odan ári jalǵastyrý jáne osy baǵyttaǵy seriktestikti nyǵaıtý týraly ortaq pikirge keldi.
Bul shara azamattyq qoǵamdy nyǵaıtý jáne Almaty qalasynda turaqty damý maqsattaryna qol jetkizý jolyndaǵy mańyzdy qadamdardyń biri retinde baǵalandy.