Tize býyny jaraqaty barlyq jaraqattar arasynda ekinshi oryn ıelenedi.
Statısıkaǵa súıensek, sporttyq oıyndarmen jáne bımen aınalysatyndar tizesin kóp jaraqattaıdy eken. Tize býyny ádette, soǵylǵanda, aýyr salmaq túsken kezde jaraqattanady. Jaraqattyń bul túri jasóspirimder arasynda jıi kezdesedi deıdi mamandar. Oǵan sportpen shuǵyldanyp, túrli júktemege qosa boıdyń tez ósýi, gormonaldyq ózgerister, salmaq qosý syndy faktorlar sebep.
Tize býynynda ásirese menısk kóp zaqymdanady. Ony tigýge nemese kesip tastaýǵa bolady. Emdeý taktıkasyn ortohırýrg maman naýqastyń jasy, býyndaǵy ózgerister, menısktiń úzilý túri, búlingen jerdiń kólemi syndy faktorlardy eskere otyryp tańdaıdy. Sebebi ol býynnyń fýnksıalaryn tolyq saqtap qalýǵa mindetti. Sonyń ishinde tigý tehnıkasynyń da mańyzy zor. Qazirgi tańda mamandar tigistiń «syrttan ishke qaraı», «ishten syrtqa qaraı», «ishteı» deıtin úsh túrin qoldanady.
Almatydaǵy №7 qalalyq klınıkalyq aýrýhananyń Ortohırýrgıa bólimshesi dárigerleri menıskisin ertede zaqymdaǵan pasıentterdiń tize býynyn jańa ádispen tigedi. «İshten – syrtqa» dep atalatyn jańa ádistiń avtory ortohırýrg Arnat Baızaqov.
Bizdiń búgingi keıipkerimiz – 19 jastaǵy pasıent kásibı sporttyq bımen aınalysady. Ol «Eski jaraqat saldarynan oń jaq tizesiniń medaıaldy menıski zaqymdandy» degen dıagnozben №7 aýrýhanaǵa jatqyzylǵan.
Aıtýynsha, oń jaq tizesi aýyr nárse kótergende qatty aýyryp, júrip-turýy qıyndaǵan. Sportshy qyz osydan bir aı buryn jattyǵý barysynda oń jaq tizesimen qulaǵan kórinedi. Tirkelgen emhana dárigerleri MRT jasap, josparly túrde emdelýge joldama bergen.
Dáriger Arnat Baızaqov, kómekshiler Erlan Ámirov, Ádil Jańabergenov, anestızıolog Teljan Tynymqulov, medbıke Záýre Quraqbaevadan quralǵan brıgada naýqastyń tize býynyna atroskopıalyq ota jasap, zaqymdanǵan menıskti avtorlyq ádispen tikti.
Aýrýhananyń Ortohırýrgıa bólimshesi meńgerýshisi Arnat Baızaqovtyń sózine súıensek, menıski zaqymdanǵan jas pasıentterdi emdeýde aǵzanyń qyzmetin saqtap qalýǵa kómektesetin ádister qoldanylady. Sonyń biri – menıskini tigý bolyp tabylady.
«İshten – syrtqa» dep atalatyn tehnıka menıskiniń artqy jáne ortańǵy bóligi zaqymdanǵan jaǵdaıda qoldanylady. Bul tehnıka býyn shemirshegi men júıke-býyn qurylymdary anatomıasynyń búlinýine jol bermeıdi.
Operasıanyń sátti shyǵýyna tigiste qoldanylatyn materıaldyń da mańyzy zor. Qazirgi tańda mıkrohırýrgıada býyndy uzaq ustap turýǵa qabiletti, beti tegis, býynǵa sińip joq bolyp ketpeıtin polıpropılen sıntetıkalyq propıleni qoldanylady.
«Qoldanystaǵy materıaldy paıdalana otyryp jasalǵan operasıa jaqsy nátıje berdi. Otadan keıin ekinshi kúni pasıent belsendi qımyldar jasap, aıaǵyn qozǵalta bastady. Otanyń orny da jazyldy. Aýyrsyný basylyp, zaqymdanǵan býynnyń qyzmeti qalpyna keltirildi», - deıdi Arnat Baızaqov.
Pasıent medısınalyq ońaltý bólimshesi mamandarynyń kómegimen tynys alý jattyǵýlaryn, ota jasalǵan aıaqtyń jambas bulshyq etterin ızometrıalyq qysqartýǵa baǵyttalǵan jattyǵýlar jasady. Ota ornyndaǵy jara tez jazylyp ketý úshin bes kún boıy joǵary jıiliktegi últra magnıtti terapıa seansyn qabyldady. Nátıjesinde stasıonarda jatý merzimi qysqaryp, naýqas 7-kúni aýrýhanadan shyǵaryldy.
Naýqas emdik jattyǵýlardy jalǵastyryp, emhanadaǵy hırýrg mamannyń baqylaýynda boldy. Ota jasaýshy dáriger ony artroskopıalyq operasıadan keıin 6 aptadan soń qaıta qabyldady. Qoldanylǵan polıpropılendi monojip menısktiń zaqymdanǵan fragmentteriniń birigip, jazylyp ketýine yqpal etti, deıdi dáriger.