Naýryz meıramyna arnalǵan respýblıkalyq chellendj 20 naýryzda saǵat 12:00-de bastalady.
Barlyq bilim berý uıymdarynda ulttyq kúı bir mezette oınaıdy, dep habarlaıdy Almaty-akshamy.kz Oqý-aǵartý mınıstrliginiń baspasóz qyzmetine silteme jasap.
Shara óskeleń urpaqtyń boıynda rýhanı-adamgershilik qundylyqtary men patrıottyq sezimderdi qalyptastyrýǵa, eldiń mádenı murasyn jalǵastyrýǵa, balalar arasynda dombyrada oınaýdy nasıhattaýǵa baǵyttalǵan.
«Dombyrashylar chellendjiniń maqsaty – balalar men jastardyń, muǵalimder men ata-analardyń mýzykadaǵy shyǵarmashylyq jetistikterin kórsetý jáne dombyrany dáripteý. Sharaǵa barlyq nıet bildirýshiler qatysa alady. Bul chellendj byltyr alǵash ret ótti. Dombyranyń kúmbirlegen úni bir ýaqytta barlyq bilim berý uıymdarynda oınady. Bul – elimizdiń mádenı ómiri úshin eleýli oqıǵa. Sharalar «Birtutas tárbıe» baǵdarlamasy aıasynda ótkiziledi», – deıdi tárbıe jumysy jáne qosymsha bilim berý departamentiniń dırektory Merýert Medetbekova.