Almatynyń onkologıalyq ortalyǵynda jyl basynan beri 2 myńǵa jýyq hırýrgıalyq ota jasaldy, onyń 50 paıyzdan astamynda beıneendoskopıalyq tehnıka qoldanylǵan, bul naýqastyń aýrýhanada bolý uzaqtyǵyn qysqartyp, operasıadan keıingi kezeńdi jeńildetedi. Bul týraly Óńirlik komýnıkasıalar qyzmetinde ótken brıfıńte Almaty onkologıalyq ortalyqtyń dırektory Nursultan İzbaǵambetov aıtty, dep habarlaıdy Almaty-akshamy.kz.
Ortalyqtyń hırýrgıalyq bóliminde ártúrli hırýrgıalyq operasıalar jasalady: gınekologıalyq, mammologıalyq, keýde qýysy, abdomınaldy, nesep-jynys otalary.
Naýqastarǵa kórsetiletin barlyq em joǵary tehnologıanyń kómegimen júrgiziledi, buryn bizdiń azamattarymyz ol úshin shetelge baratyn.
Operasıalardyń jartysyna jýyǵy az ınvazıvti ádispen jasalady, bul ońaltý ýaqytyn qysqartýǵa jáne ota barysynda úlken tilikterdi boldyrmaýǵa múmkindik beredi.
Almaty onkologıalyq ortalyǵy - operasıalardy ashyq ári laparoskopıamen jasaıtyn Qazaqstandaǵy ozyq klınıkalardyń biri. Osy maqsatta onkologıalyq ortalyq barlyq qajetti joǵary tehnologıalyq qondyrǵylarmen jabdyqtalǵan. Mamannyń aıtýynsha, naýqastardyń 30%-dan astamy aýrý asqyna túsken kezde, úshinshi jáne tórtinshi kezeńderde emdelýge keletin kórinedi. Bul ýaqytta em uzaq ári barlyq ádisterdi qoldana otyryp júrgiziledi.
Sol sebepti de sarapshy el aýmaǵynda tegin skrınıngter júrgiziletinin jáne ýaqtyly dárigerge qaralyp, aldyn alý tekserýlerinen ótý kerektigin eske salady.
«Qaterli isikti barynsha erte anyqtaý ony emdeý múmkindigin de arttyrady», - dep túsindirdi İzbaǵambetov.