Almatynyń onkologıalyq ortalyǵynda qaterli isikke shaldyqqan 15 myńǵa jýyq naýqas em qabyldady
Bul týraly búgin Óńirlik komýnıkasıalar qyzmetiniń brıfıńinde Almaty onkologıalyq ortalyǵynyń dırektory Nursultan İzbaǵambetov aıtty, dep habarlaıdy Almaty-akshamy.kz.
Bıylǵy jyldyń 9 aıynda Almaty onkologıalyq ortalyǵynda 14615 naýqas emdeldi, bul ótken jyldyń sáıkes kezeńimen salystyrǵanda 1359 naýqasqa kóp.
Hırýrgıalyq bólimderde 2000-ǵa jýyq ota jasaldy, olardyń 50%-dan astamynda beıneendoskopıalyq tehnıka qoldanyldy, bul pasıenttiń aýrýhanada bolý uzaqtyǵyn qysqartyp, operasıadan keıingi kezeńdi jeńildetedi.
Táýlik boıy jáne kúndizgi stasıonar jaǵdaıynda 12 061 naýqas hımıaterapıalyq em qabyldady. 24 myńnan astam KT jáne MRT sáýleli zertteýi júrgizildi. 793 onkonaýqasqa sáýleli terapıa emi júrgizildi.
Almatylyqtar sáýleli terapıa emin AQSH-ta jasalǵan joǵary energetıkalyq jelilik údetkish kómegimen alatynyn esterińizge salamyz.
Bul qurylǵy saý tinderdi qozǵamaı, ıondalǵan bólshekter shoǵyn isiktiń ózine tikeleı baǵyttaýǵa múmkindik beredi.
«Prosedýra aýyrsynýsyz ótedi. Sáýlelendirý seansynyń ózi nebári eki mınýtty alady, al qalǵan ýaqyt pasıentti ártúrli arnaıy qurylǵylardyń (fıksatorlar, maskalar) kómegimen emdeý ústeline jatqyzýǵa, sodan keıin em jasalatyn aımaqqa sáýleni baǵyttaýǵa jáne prosedýranyń sapaly júrgizilýin baqylaýǵa ketedi. Aıta ketetini, sapany baqylaýmen TMD elderindegi eń úzdik ujymdardyń biri – medısınalyq fızıkter aınalysady. Sondaı-aq, osy jelilik údetkishti qoldanysqa engizgeli beri, qala turǵyndary úshin sáýlelik terapıaǵa kezek pen ortasha kútý ýaqytyn qysqartýǵa múmkindik bergenin erekshe atap ótkim keledi. Bizdiń bólimde kún saıyn 80-ge jýyq almatylyq em alady», - dedi Nursultan İzbaǵambetov.