Ótken jylmen salystyrǵanda onkologıalyq dertke shaldyqqandar sany 303 adamǵa ósti. Óńirlik komýnıkasıalar qyzmeti alańynda ótken brıfıńte Almaty qalalyq onkologıalyq ortalyǵynyń dırektory Nursultan İzbaǵambetov jyl saıyn árbir besinshi naýqas Almatyǵa sapaly medısınalyq kómek alý úshin Qazaqstannyń basqa óńirinen keletinin atap ótti, dep habarlaıdy Almaty-akshamy.kz.
Onkologıalyq aýrýlardan bolatyn ólim-jitim boıynsha birinshi orynda – sút bezi obyry (14,7%, 533 jaǵdaı), ekinshi – kolorektaldi qaterli isigi (9,3%, 337 jaǵdaı), úshinshi – ókpe qaterli isigi (7,5%, 273 jaǵdaı), tórtinshi – asqazan qaterli isigi (5,1%, 186 jaǵdaı) tur.
Mańyzdy atap ótetin jaıt, onkologıalyq naýqastar sany jyl saıyn kóbeıgenmen, bıylǵy 9 aıdyń qorytyndysy boıynsha ólim kórsetkishi tómendegen. Bul Almaty qalasyndaǵy onkologıaǵa shaldyqqan naýqastardyń emdeýmen tolyq qamtylýymen jáne qala emhanalarynda aýrýdy erte anyqtaý maqsatynda dıagnostıkanyń artýymen baılanysty. Qaterli isikterdi erte dıagnostıkalaý 36,3%-ǵa deıin ósken.
2022 jyldyń 9 aıynda onkologıalyq aýrýdy erte anyqtaý boıynsha skrınıngtik jospardyń oryndalýy 86,7% qurady, 137 qaterli isik derti anyqtaldy.
Nursultan İzbaǵambetov skrıng arqyly tekserilý mańyzdylyǵyn atap ótti.
«Ýaqtyly dıagnostıkadan ótý qaterli isik aýrýyn erte kezeńde anyqtaýǵa múmkindik beredi, sonyń arqasynda bizdiń de adamdy keıbir jaǵdaılarda tolyq emdeýge múmkindigimiz joǵary», - dep atap ótti maman. - Naýqastyń ómir súrý sapasy biz ony aýyr em jasalatyn hımıaterapıa jáne radıkaldy operasıalar qoldanylatyn úshinshi nemese tórtinshi kezeńde emdeı bastaǵanymyzdan góri erterek bastaý birneshe ese jaqsyraq bolady. İsik áli ulǵaımaı turyp onymen kúresý naýqas úshin onyń odan keıingi ómirine jeńil ári tıimdirek bolady».
Tıimdiligi dáleldengen qaterli isik skrınınginiń ádisteri: 40-70 jastaǵy áıelderde eki jylda bir ret sút bezi obyrynyń mammografıalyq skrınıngi; 30-70 jas aralyǵyndaǵy áıelderde tórt jylda bir ret isik aldy jáne jatyr moıny obyryna sıtologıalyq skrınıng júrgizý; 50-70 jas aralyǵynda eki jylda bir ret jasyryn qan analızi, kolonoskopıa arqyly toq ishektiń jáne tik ishektiń qaterli isigine jáne isik aldy aýrýlaryna skrınıng júrgizilip turady.