Búgin Naýryzbaı aýdanynda «Qalqaman» jáne «Aqjar» skverine 600 kóshet otyrǵyzyldy. İs-shara «Almaty – baq qala» aksıasy aıasynda ótti. Bul «Taza Qazaqstan» respýblıkalyq aksıasy men «Almaty – bizdiń ortaq úıimiz» qalalyq naýqanynyń mańyzdy is-sharalarynyń biri bolyp tabylady.
Aksıa jergilikti turǵyndarmen birge, Qazaqstan juldyzdarynyń da basyn qosty. Olar 350 alma jáne 250 buta kóshetin otyrǵyzdy.
Kúntýǵan Sultan, Eset Sádýaqasov, Eldar Tashkenbaı sıaqty eńbek sińirgen qaıratkerler men ánshiler, sondaı-aq qoǵamdyq uıymdardyń ókilderi, kásipkerler, sonyń ishinde Karkenova Mádenıet, Sana Jandaı, Gúlzada Raıysova, Dmıtrıı Dreev, Asqat Ábdiksim, Dıdar Shajalıev jáne Janna Tilebaeva «Almaty – baq qala» ekologıalyq aksıasyn qoldaýǵa jınaldy. Olardyń bir kisideı qoldaýy tabıǵatty qorǵaý men qalada jasyl keńistikter qurýdaǵy talpynystyń, birliktiń jarqyn mysaly bolyp tabylady.
«Bul is-sharalar qalamyzdy ádemi ári jaıly etýmen qatar, qoǵamdastyqtyń birligi men yntymaqtastyǵyna yqpal etedi. Qoqysty birge tazalap, saıabaqtar men kóshelerdi kórkeıtkende, biz qorshaǵan ortaǵa ǵana emes, sonymen birge ortaq úıimizge – ózimiz ómir súrip jatqan qalaǵa qamqorlyq jasaımyz. Osyndaı is-sharalarǵa qoldaý kórsetýdi jalǵastyraıyq jáne taza ári jaıly keńistik qurýǵa úles qosaıyq», - dedi Almaty qalasy Qoǵamdyq keńesiniń múshesi Sana Jandaı.
«Búgin men de «Almaty - bizdiń ortaq úıimiz» naýqany aıasynda ótip jatqan «Almaty – baq qala» aksıasyna qatysýǵa bel býdym. Qalamyz jyl saıyn gúldene bersin!», - dep belgili ánshi, eńbek sińirgen mádenıet qaıratkeri Eset Sádýaqasov qalanyń bastamasyn qoldady.
«Qalamyz ejelden almanyń Otany retinde tanylǵanyna qaramastan, Almaty turǵyndary «alma qalasy» atanýyna septigin tıgizgen alma baqtarynyń qandaı bolatynyn umyta bastady. Alaıda «Almaty – baq qala» aksıasy men birlesken kúsh-jigerdiń arqasynda súıikti qalamyzdyń burynǵy dańqyn jańǵyrta alamyz dep senemin», - dedi aýdan turǵyndarynyń biri.
«Alma kóshetin egetinin estigende, qatty qýandym. Bul shynymen de jaqsy ıdeıa. Endi bul aǵashtarǵa kútim jasaý kerek. Men jaqyn mańda turamyn. Sondyqtan taldardy sýarýdy, aǵashtyń tamyr jaıǵanyna kóz jetkizýdi josparlap otyrmyn», - dedi mektep oqýshysy Ádil Saǵatbek.
Otyrǵyzylǵan aǵashtardy kútip-baptaý tolyǵymen merdigerlik uıymǵa júkteledi. Jyl boıy olar aǵashtarǵa kútim jasap, sýaryp, tyńaıtqyshty jáne magıstraldyq sheńberlerdi aerasıalaıdy. Soǵan sáıkes, barlyq aǵash kepildikke tur jáne jyl saıyn tamyrlanyp ketýi tekseriledi. Kóshet qýrap qalǵan jaǵdaıda merdiger uıym kepildik mindettemelerine sáıkes jańasyn otyrǵyzady.