Megapolıstiń medısınalyq mekemeleri pandemıanyń úsh kezeńine de daıyn.
Búginde Almatyda kovıdtik aýrýhanalarda 700-ge jýyq adam emdelýde. Óńirlik komýnıkasıalar qyzmeti alańynda ótken baspasóz konferensıasy barysynda Almaty qalasy Qoǵamdyq densaýlyq basqarmasynyń basshysy Narıman Tabynbaev epıdemıalyq ahýal nasharlasa, onda qalada 10 myńǵa deıin ulǵaıtý múmkindigimen 4 myńǵa jýyq tósek-oryn daıyndalǵanyn jetkizdi, dep habarlaıdy Almaty-akshamy.kz.
Narıman Tabynbaevtyń aıtýynsha, ótken táýlikte Almatyda koronavırýstyq ınfeksıanyń 215 jaǵdaıy tirkelgen. Olardyń barlyǵy jergilikti turǵyndar, al 186 turǵynda aýrý belgileri bar, qalǵandary sımptomsyz. Búginde dárigerlerdiń baqylaýynda 1 196 naýqas bar.
Onyń málietinshe, megapolıstiń medısınalyq mekemeleri pandemıanyń úsh kezeńine de daıyn. Qalada densaýlyq saqtaý júıesiniń rezervteri qyzmet atqarady, stasıonarlarda naýqastardyń shamadan tys tolýy bolmaıdy.
«Biz indetpen kúresýge daıynbyz. Júıeniń qýaty jetkilikti. 4 600-den astam medısına qyzmetkeri kovıdtik aýrýhanaǵa jumysqa shyǵýǵa daıyn, túrli jaǵdaı kezinde 200-den astam jedel medısınalyq járdem brıgadasy jumys isteıdi. Mysaly, búginde stasıonarlarda 3 700 tósek-oryndy, qolaısyz jaǵdaıda 6 000 tósek-oryndy, óte qolaısyz jaǵdaıda 10 000 tósek-oryndy ornalastyrýǵa daıynbyz», - dedi Narıman Tabynbaev.
Budan ózge, eger jaǵdaı ýshyǵatyn bolsa, onda mobıldi brıgadalar sany eki esege artatyn bolady. Sondaı-aq CALL-ortalyqtarynyń operatorlarynyń sanyn eki esege arttyrý josparlanyp otyr. QDB-nyń basshysy vedomstvonyń koronavırýsqa qarsy kúresti toqtatpaǵanyn atap ótti. Aýrýhanalar men emhanalar dári-dármektermen jáne medısınalyq tehnıkamen jetkilikti kólemde jabdyqtalǵan.
Aýrýhanalar men stasıonarlardyń shamadan tys júktelýine jol bermeý úshin QDB basshysy halyqty vaksınalanýǵa shaqyrdy. Narıman Tabynbaevtyń aıtýynsha, búginde 428 532 adam ekpe aldy. 60 jastan joǵary ekpe alǵan adamdar 69 644 adamdy quraıdy. Vaksına naýqany jalǵasýda. Vaksınany qalanyń 208 ekpe pýnktiniń birinen alýǵa bolady.