Almatynyń Medeý aýdanynda 60 km jańa sý qubyry jáne káriz jelisi salynady
Almatynyń Medeý aýdanynda joldy aǵymdaǵy jóndeý lımıti ulǵaıtyldy, sondaı-aq 60 km jańa sý qubyry jáne káriz jelileri salynady. Bul týraly Almaty qalasynyń ákimi Erbolat Dosaev aýdan turǵyndarymen kezdesýde málimdedi, dep habarlaıdy aqshamnews.kz
«Kamensk ústirti» shaǵyn aýdany turǵynynyń biri taýly aımaqta joldyń aýyr júk kólikterinen jáne jańbyr sýy aǵatyn kárizdiń joqtyǵynan buzylyp jatqanyna shaǵymdandy. Sondaı-aq, ol laı kóshkini qaýpi bar aımaqtardyń kartasyn daıyndap, jarıalaýdy surady.
Erbolat Dosaev atap ótkendeı, Medeý aýdany boıynsha 74 ýchaske tekserildi, onyń 10-y asa qaýipti, olarǵa tıisti sharalar qabyldanýda. Sonymen qatar, TJ aıasynda 5 ýchaskeniń betkeıi nyǵaıtylady.
«6 ýchaskeni satyp alamyz, sebebi ol jerlerde nyǵaıtýdyń qajeti joq. Biz úılerdi satyp alyp, adamdardy kóshiremiz», - dedi qala basshysy.
53 ýchaskede josparly rejımde keshendi jumystar júrgiziledi. QazQSǴZI-men birlesken jumys aıaqtalǵannan keıin laı kóshkini qaýpi bar aımaqtardyń kartasy aýdan ákimdigi men qalalyq josparlaý jáne ýrbanıstıka basqarmasynyń saıttarynda saıttarynda jarıalanady.
Sonymen birge, qala basshysy Erbolat Dosaev sýmen jabdyqtaý, káriz júıesi syndy aýdannyń ınfraqurylymyna baılanysty jumystar bastalǵanyn atap ótti. 60 km jeli salý kózdelip otyr. Buǵan qosa, joldy aǵymdaǵy jóndeýge lımıtter ulǵaıtyldy.
«Qalalyq mobıldilik basqarmasy ınjenerlik jeliler daıyn bolǵan saıyn joldardy tóseıdi. Biz aǵymdaǵy jóndeýdi múmkindiginshe jasaýǵa tyrysamyz, biraq jaqsy joldardy ınjenerlik jeliler tóselgende ǵana jasaý qajet. Eger búgin jol salsaq, kelesi kóktemde bárin qaıta qazýǵa týra keledi. Aýdanda bul jumystyń rettiligine qatysty naqty jospar bar», - dedi ákim.
Sonymen qatar, ákim buryn ýáde etilgendeı, bıyl sýmen qamtamasyz etý máselesi sheshilgenin aıtty.