Almaty ákimi Erbolat Dosaev Medeý aýdanynyń turǵyndarymen ótken kezdesýde turǵyndardyń keıbir kásipkerlerge qatysty shaǵymyna jaýap berdi, dep habarlaıdy aqshamnews.kz
«Qaldaıaqov kóshesinen Qasteev kóshesine deıingi aralyqta únemi tútinniń ıisi shyǵady. Jeke úıdiń ornyndaǵy shaǵyn aýmaqta káýap pisiretin oryn paıda bolady: tútin, qolamsa ıis, kólik turaǵy joq", - dep shaǵymyn aıtqan turǵyn qala basshysynan tıisti shara qoldanýyn surady.
Megapolıs ákimi bul baǵytta túbegeıli sharalar qabyldaý úshin zańnamaǵa ózgerister engizý qajet ekenin túsindirdi.
"Bizde jer zańnamasy boıynsha nysanaly maqsatymyz jáne fýnksıonaldyq aımaqtarǵa bólý jaı ǵana "Saýda" dep qarastyrylǵan, oǵan barlyǵy kiredi. Ekologıalyq standarttar nemese sanıtarlyq normalar turǵysynan rettelýi kerek talaptar bulyńǵyr. Biz óz usynysymyzdy jasadyq, ózgertýler engizýin suradyq. Biz ýákiletti memlekettik organdarǵa jetkizýge tyrysamyz jáne tútindi boldyrmaý úshin retteý júıesin ózgertý boıynsha jumys jasaımyz", - dep jaýap berdi Erbolat Dosaev.
Qala basshysy jeke menshik quqyǵy bar ekenin jáne "zańnama aıasynda ǵana áreket etýge bolatynyn" atap ótti.
"Bizde órt qaýipsizdigin qamtamasyz etýge baılanysty organ bar – TJD, ekinshisi-sanıtarlyq-epıdemıologıalyq baqylaý departamenti. Jyl basynan beri moratorıı alynyp tastaldy, eger sizdiń tarapyńyzdan resmı ujymdyq ótinishter bolsa, men eki departamentten de belgilengen tártippen bizdiń azamattardyń densaýlyǵyn qorǵaý men qaýipsizdikti qamtamasyz etý sheńberinde olardy qaraýdy suraımyn", - dep atap ótti megapolıs ákimi.
Erbolat Dosaev óziniń jetekshilik etetin orynbasary men aýdan ákimine máseleni baqylaýǵa alýdy tapsyrdy.