Almaty qalasy Medeý aýdanynyń ákimi Áset Masabaev Óńirlik komýnıkasıalar qyzmeti alańynda aýdannyń 2021 jylǵy ınfraqurylymdyq damýy týraly aıtyp berdi
Áset Masabaevtyń aıtýynsha, bıyl Medeý aýdanynda uzyndyǵy 52,9 km bolatyn 45 kóshede ortasha jóndeý jumystary júrgizilgen. Bul rette keshendi jol jóndeý tek júris bóligindegi jóndeý jumystaryn ǵana emes, trotýarlardy uıymdastyrýdy da qamtıdy. Kelesi jyly jalpy uzyndyǵy 30 km bolatyn 32 kósheni ortasha jóndeýge ótinim berilgen, dep habarlaıdy Almaty-akshamy.kz
Áset Musabaev sondaı-aq Buqtyrma kóshesi men Qulja traktisi qıylysynda salynyp jatqan kólik aıryǵynda estakada boıynsha qozǵalys ashylǵanyn habarlady. Qulja traktisi boıynsha eki baǵytta kólik qozǵalysy uıymdastyryldy.
Aýdan ákimi qalada abattandyrý tásili ózgergenin, sońǵy jyldary «Búdjetke qatysý» baǵdarlamasy jumys istep turǵanyn, sonyń arqasynda turǵyndar megapolıstiń syrtqy kelbetin ózgertýge qabiletti qandaı da bir jobany iske asyrýǵa daýys bere alatynyn atap ótti.
2021 jyly baǵdarlama aıasynda Nazarbaev dańǵyly 176, 264, Dostyq dańǵyly 95, 109, 111, "Samal" shaǵynaýdany 1,2,3, Elebekov kóshesi 29, Abdýllınder kóshesi 49, 28 gvardıashyl-panfılovshylar atyndaǵy saıabaqta, Núsipbekov kóshesi 19, Pýshkın kóshesi 3 boıynsha tereńdetilgen úlgidegi 50 konteıner alańy ornatyldy.
Sonymen qatar, turǵyndardyń daýys berý nátıjeleri boıynsha Maqataev kóshesi men Mámetova kóshesi arasyndaǵy Tólebaev kóshesindegi jaıaý júrginshiler aımaǵyna, Abylǵazy ózeni arqyly ótetin pandýstary bar jaıaý júrginshiler kópiri men baspaldaqqa, "Alataý" shaǵynaýdanyndaǵy serýendeý aımaǵyna aǵymdaǵy jóndeý, Shoqaı kóshesi boıynsha trotýardy, VOAD boıynsha jaıaý júrginshiler jolyn jóndeý, "Alataý" shaǵynaýdanyndaǵy Ardagerler aleıasyn, Medısına qyzmetkerleri aleıasyn jóndeý júrgizildi. Sondaı-aq, «Búdjetke qatysý» baǵdarlamasy aıasynda Lýganskıı kóshesiniń boıynda 70 jáne 80 úıler arasynda skeıt-alańdar, Tóle bı kóshesiniń boıynda parkýr alańdary, Ormanov kóshesinde "Dýman" jabyq sport alańy, Qumaı kóshesinde balalar men sport alańdary ornatyldy. 2022 jyly taǵy 20 jobany júzege asyrý josparlanýda.
Sonymen qatar, aýdanda 273 kósheniń jaryqtandyrylýy jańartylyp, 10 614 sham ornatyldy. Aýdan ákimi bıyl 60 aýla aýmaǵyna aǵymdaǵy jóndeý júrgizilgenin aıtty. Jumystar aıasynda shaǵyn sáýlet nysandaryn boıaý jumystary júrgizildi, shamdar aýystyryldy, rezeńke jabyndar tóseldi, aǵashtardy sanıtarlyq kesý júrgizildi, vorkaýt snarádtary men kúshtik trenajerler ornatyldy. Kelesi jyly 40 aýlany aǵymdaǵy jóndeýge ótinim berildi. Sońynda ol "Samal-2" shaǵynaýdanyndaǵy ál-Farabı dańǵyly boıyndaǵy 22 úıdiń qasbetterin jóndeý jáne 57 myńnan astam aǵash otyrǵyzý týraly baıandady.