Esentaı men Kishi Almaty ózenderiniń mańy abattandyryldy
Almaty qalasy Medeý aýdanynyń ákimi Áset Masabaev Óńirlik komýnıkasıalar qyzmeti alańynda Kishi Almaty ózeni men Tiksaı ózeni arnasynyń boıyndaǵy jaıaý júrginshiler aımaǵyn rekonstrýksıalaý, sondaı-aq Esentaı ózeni mańynda Promenad salý týraly aıtyp berdi, dep habarlaıdy Almaty-akshamy.kz
«Bul aýmaqtardy abattandyrýdyń basty mindeti – Almaty jaǵalaýlaryn jaıly jáne qaýipsiz jerge aınaldyrý. Ol úshin biz trotýarlardy keńeıtip, butalardan jasyl qabyrǵa otyrǵyzdyq. Sý mańyndaǵy keńistik jaıaý júrginshilerge berildi, balalar alańdary paıda boldy», - dedi Á. Masabaev.
Sondaı-aq, Kishi Almaty ózeniniń boıyndaǵy jaıaý júrginshiler aımaǵyn qaıta jańartý júrgizildi. Uzyndyǵy 9 km jaıaý júrginshi joly abattandyryldy, aýmaqta jasyl qor jaqsartyldy, 5 myńǵa jýyq buta ósimdikteri otyrǵyzyldy, gabıon qurylymdary nyǵaıtyldy jáne qalpyna keltirildi.
- Sonymen qatar, Maqataev kóshesindegi kópir qaıta jóndeldi. Qalalyqtarǵa yńǵaıly bolý úshin jańa oryndyqtar jańartylyp, qosyldy, navıgasıalyq stendter men aqparattyq stelalar ornatyldy. Sondaı-aq, ál-Farabı dańǵylynyń astyndaǵy týnel abattandyryldy, al oqýshylar saraıy ǵımaratynyń artynda baqylaý alańy quryldy. Keńistiktiń úılesimdiligi men tutastyǵyn saqtaý úshin barlyǵy aǵashtan jasalǵan, - dedi aýdan ákimi. - Qala turǵyndarynyń kóptegen ótinishteri boıynsha sanıtarlyq toraptar ornatylyp, iske qosylǵan, sondaı-aq balalar alańdary uıymdastyrylǵan.
Sonymen qatar, Esentaı ózeninde jańa promenadtyq aımaqtyń qurylysy jalǵastyryldy. Sý bólgishten Jamaqaev kóshesine deıingi jaıaý júrginshiler aımaǵynyń jalpy uzyndyǵy 4,2 shaqyrymdy quraıdy. Búginde 1,8 shaqyrym Birinshi ýchaskede jaıaý júrginshiler jolyn salý jáne jaǵalaýdy bekitý jumystary aıaqtaldy. Jaǵalaýda jaryq shamdary, oıyn jáne sport alańdary ornatyldy. Kógaldandyrý jumystary júrgizildi, 3000 sharshy metr aýmaqqa 3 myńnan astam butalar men basqa da kóp jyldyq ósimdikter otyrǵyzyldy. 800 metr aǵash jaıaý júrginshi joly jáne 1,6 shaqyrym asfált joly salyndy. Munda sondaı-aq qaraý alańy men ózenge ashyq kórinetin ekologıalyq materıaldardan jasalǵan oryndyqtar qarastyrylǵan.
Áset Masabaev Tiksaı ózeniniń arnasyn rekonstrýksıalaý týraly da aıtyp berdi. Onyń aıtýynsha, jaǵalaýdy nyǵaıtý júrip jatyr, al jaǵalaýda tazalanbaǵan ýchaskelerdiń ornyna jaıaý júrginshiler joly bar jańa qoǵamdyq keńistikter qurylatyn bolady. Jaǵalaý jaryqtandyrylady, jumystardy aıaqtaý 2022 jylǵa josparlanǵan.
Sonymen qatar, Medeý aýdanyndaǵy Dostyq gúlzarynda Kishi Almaty ózeni boıynda Qurmanǵazy kóshesinen Gogol kóshesine deıin kúrdeli jóndeý jumystary júrgizildi. Jaryqtandyrý, oryndyqtar men qoqys jáshikterin ornatý jumystary júrgizildi, brýschatka men jańa asfált tóseldi. Sondaı-aq, balalar men sport alańdary paıda boldy, aǵashtar, gúlzarlar men butalar otyrǵyzyldy.
Osy jyly Jamal Omarova kóshesindegi Dostyq dańǵylynan Lýganskıı kóshesine deıingi jalpy uzyndyǵy 500 metr jaıaý júrginshiler jolyna aǵymdaǵy jóndeý jumystary aıaqtaldy. Qoǵamdyq keńistik qalpyna keltirildi, kógaldar, butalar men aǵashtar otyrǵyzyldy, jaryqtandyrý baǵanalary ornatyldy, trotýar plıtkalary tóseldi.