"Dýman", "Kólsaı", "Muztaý" shaǵynaýdandary «Jańa Almaty» jospary aıasynda ınjenerlik jelilermen qamtamasyz etildi
Bul týraly Óńirlik komýnıkasıalar qyzmeti alańynda ótken baspasóz konferensıasy barysynda Almaty qalasy Medeý aýdanynyń ákimi Áset Masabaev habarlady, dep habarlaıdy Almaty-akshamy.kz.
«Taza sý máselesi búginde Almatynyń barlyq aýdandarynyń turǵyndary úshin óte mańyzdy. Medeý aýdanynda sýmen jabdyqtaý jelilerin jańǵyrtý boıynsha belsendi jumystar júrgizilýde. Jańa jelilerdiń qurylysy – bul eń aldymen adamdardyń ómir súrý sapasyn jaqsartý boıynsha jumys», - dedi Á. Masabaev.
Medeý aýdanynyń ınfraqurylymy keshendi túrde damıtyn bolady. Shet aımaqtardyń turǵyndary barlyq komýnaldyq qyzmettermen qamtamasyz etiledi: sý, gaz jáne elektr.
Osylaısha, "Dýman" shaǵynaýdanynda 19 km sýmen jabdyqtaý jáne 25,5 km sý burý jelilerin tóseý boıynsha jumystar aıaqtaldy. Búginde 1505 úı sýmen jabdyqtaý jáne sý burý júıelerine qosyldy. Barlyǵy 1586 úı qosylady.
"Kólsaı" shaǵynaýdanynda 15 shaqyrymnan astam ınjenerlik jeliler tartyldy, 68 úı sýǵa qosyldy, barlyǵy 315 úıdi sýmen qamtamasyz etý josparlanǵan. "Muztaý" shaǵynaýdanynda jalpy uzyndyǵy 16,7 km sýmen jabdyqtaý jáne sý burýdyń ınjenerlik jelilerin tóseý boıynsha jumystar júrgizildi. Komýnaldyq qyzmetkerler josparynda 267 úı bar.
Áset Musabaev "Kamenskoe plato" shaǵynaýdanynda ınjenerlik jeliler júrgizile bastaǵanyn, munda jalpy somasy 300 mln teńgege rezervýar salý boıynsha jumystar júrgizilip jatqanyn habarlady. Uzyndyǵy 15,5 km jelilerdi salý josparlanýda, iske asyrý merzimi – 2022 jyl.
Aldaǵy jyly S. Nurmaǵambetov, R. Baǵlanova, T. Bıgeldınov, Mańǵystaý, Radlov, Trofımov, Saharıev, Hmelev, Toporkov, Maksımov, Dombyra, Bastyr, Ormanov, Bazarbaev kóshelerinde sý burý jelileriniń qurylysyna JSQ ázirleý josparlanýda. Sondaı-aq, jergilikti organdar Ishtvan Qońyr, Taırov, Kárimbaev-1 jáne Kárimbaev-2 kóshelerinde turatyn "Dýman" shaǵynaýdanynyń (81 úı) turǵyndaryn sýǵa qosýdy josparlap otyr.
Sonymen qatar, Kereı-Jánibek handar kóshesindegi №44 bastaýǵa kóteriletin NS-1 (sorǵy stansıasy) jerasty kózderimen sý tartý ımaratynyń qurylysy júrip jatyr. Sondaı-aq, Tátibekov kóshesiniń boıynda paralel kóshelerdi qosa otyryp, káriz jelilerin salý boıynsha JSQ ázirleý josparlanýda.
Sóziniń sońynda Medeý aýdanynyń ákimi "Keńsaı", "Sulýsaı" jáne "4 birlestik" shaǵynaýdandarynda 1023 úıdiń gazǵa qosylǵanyn habarlady.