Almatynyń mańynda jylyjaı kesheni ashyldy
Elimizdegi eń iri megapolıstiń turǵyndaryn azyq-túlikpen qamtamasyz etý úshin Qarasaı aýdanyna qarasty Eltaı aýyldyq okrýginiń Qaratóbe eldi mekeninde aýylsharýashylyǵy ónimderin óndiretin «Eurasian Green Product» JSHS-niń quryltaıshylyǵymen jylyjaı kesheni ashyldy, dep habarlady Almaty-akshamy.kz. Almaty oblysy ákiminiń baspasóz qyzmeti taratqan habarǵa silteme jasap.
Keshenniń ashylý saltanatynda sóz sóılegen Qarasaı aýdanynyń ákimi Jandarbek Dalabaev sharaǵa jınalǵan qaýymdy negizinen eksporttyq baǵytta jumys jasaıtyn aýqymdy jylyjaıdyń iske qosylýymen quttyqtap, óńir basshysy Amandyq Batalovtyń sálemi men ystyq yqylasyn jetkizdi. Jylyna 3.5 myń tonna qyzanaq óndiretin keshenge «Bıznesti qoldaý» jol kartasy baǵdarlamasy aıasynda oblys tarapynan qoldaý kórsetilip, keshenniń ınfraqurylymyn qalyptastyrýǵa 330 mln. teńge jumsalǵan eken. Jańadan 100 jumys orny ashylyp,aýdan búdjetine jylyna 100 mln. teńge tólem túsedi dep kózdelýde.
Osydan keıin sóz alǵan «Agrarlyq nesıe korporasıasy» aýsıonerlik qoǵamynyń basqarma tóraǵasy Aıbolat Ábenov osydan úsh jyl buryn atalǵan jobany qarjylandyrýdy qolǵa alyp, memlekettiń qoldaýymen bólingen 3,7 mlrd. teńgeniń nátıjesinde elimizde balamasy joq jańa jylyjaı kesheni paıda bolǵanyn qýana jetkizdi. Aldaǵy ýaqytta osy keshenniń janynan taǵy 5 gektar alqapqa qıar ósiretin jylyjaı turǵyzý jospary bar eken. Aıbolat Jaqsylyquly «Agrarlyq nesıe korporasıasy» bul jobaǵa da qoldaý kórsetetinin aıtyp, keshen qyzmetkerleriniń jumysyna sáttilik tiledi.
Óz kezeginde «Eurasian Green Product» JSHS quryltaıshylarynyń biri Jandos Turssynǵalıev óndiristik saltanatty sharanyń qonaqtaryna jylyjaı kesheniniń jumysy men bolashaqtaǵy josparlary týraly áńgimelep berdi. Atalǵan kompanıa buǵan deıin de aýylsharýashylyǵy salasynda birshama sharýalar atqarǵan bolatyn. Al, bul joly jylyna 3 407 tonna qyzanaq ósiretin, Golandıanyń eń sońǵy tehnologıasy boıynsha salynǵan alyp keshen óndiriske engizilip otyr. Atalǵan jobaǵa 5,5 mlrd. teńge ınvestısıa tartylyp, 100-den asa jergilikti turǵyn turaqty jumyspen qamtamasyz etiletin bolady. Osy arqyly Almaty oblysy men qalasyn asa sapaly qyzanaqpen qamtamasyz etip, Reseıge eksportqa shyǵarý júzege asyrylýda. Úshinshi kezeńge arnalǵan jospar boıynsha osy jerden kókónis pen jemis saqtaý qoımasy salynady dep kútilýde.
Óndiristik jylyjaı kesheniniń lentasyn qıǵannan keıin qonaqtar jylyjaıdyń ishin aralap, óndiristik qurylymdarmen tanysty. Sońynan keshenniń aldyna kók jelekterdi otyrǵyzý dástúrine kezek berildi.
