Qazaqstan quramasynyń oıynshysy Maksım Samorodovqa sheteldik klýbtar tarapynan qyzyǵýshylyq artty.
Qazirdiń ózinde Reseı, Túrkıa jáne Italıa elderiniń komandalary nazar aýdaryp otyr, dep habarlaıdy Almaty-akshamy.kz.
24.kz habarlaýynsha, jartylaı qorǵaýshynyń ózi bıyl kúzde Máskeýde bolyp qaıtty. Keıin «Lokomotıv», «Krasnodar», «Spartak» jáne «Rostov» komandalaryna aýysýy múmkin degen aqparat taraǵan edi. Kúni keshe túrkıalyq «Trabzonspor» komandasynyń da Maksımdi baqylap júrgeni belgili boldy jáne aldaǵy transferlik maýsymda komandaǵa kelýi múmkin oıynshylar tizimine qosqan.
Buǵan qosa, ıtalıalyq «Torıno» komandasy da qazaqstandyq fýtbolshyny jiti nazarda ustap júr. Jerlesimizdiń ózi naqty qaıda baratynyn jarıalaǵan joq. Belgilisi, qazir óner kórsetip júrgen «Aqtóbe» komandasy ony óz sapynda alyp qalǵysy keledi. Osy maqsatta oǵan jańa kelisimshart usynǵan. Al Transfermarkt portaly 21 jastaǵy qazaqstandyq aıaqdopshynyń naryqtyq qunyn 900 myń eýroǵa baǵalap otyr.