Erteń Almatyda qalyń qar jaýady degen boljam bar.
Osyǵan baılanysty Almatynyń komýnaldyq qyzmeti kúsheıtilgen jumys rejımine kóshti, dep habarlaıdy aqshamnews.kz.
«Qazgıdromet» RMK-nyń málimetinshe, 8 qańtar kúni túnde jáne tańerteń qalada qardyń qalyńdyǵy 9 mm-ge deıin jetip, kóktaıǵaq bolýy múmkin. Aýa temperatýrasy túnde -5…-7 °S-qa deıin tómendep, kúndiz -2…0 °S shamasynda bolady.
7 qańtar kúni qar kúreý jumystaryna 438 arnaıy tehnıka men 968 jumysshy tartyldy. 2024-2025 jyldary qysqy maýsym bastalǵaly beri 220 myń m³ qar shyǵaryldy.
Joldy ýaqytyly ári tıimdi tazartý úshin Komýnaldyq ınfraqurylymdy damytý basqarmasy qala turǵyndaryna mynadaı eskertý jasaıdy:
• Avtokólikterdi, ásirese túngi ýaqytta, jol jıeginde qoımaýǵa.
• Joldar men avtoturaqtar boıyna ornatylǵan eskertý konýstaryna nazar aýdarýǵa.
Qar shyǵarý jumystary taýly jáne taý bókterindegi aýdandarda erekshe nazarǵa alynyp, qar kúreý jumystary belsendi júrgiziledi.
Kólik júrgizýshileri men jaıaý júrginshilerge usynystar:
Kóktaıǵaqqa baılanysty kólik júrgizýshilerinen jyldamdyq rejımi men kólikter arasyndaǵy qashyqtyqty saqtaý jáne qar shyǵarý tehnıkasy jumys istep jatqan aýmaqtarda kólik qoımaýǵa shaqyrady.
Jaıaý júrginshiler joldan ótkende, ásirese kóshe durys kórinbeı qalǵan kezde jáne jol taıǵaq bolǵan jaǵdaıda, asa saq bolǵany jón.