Bostandyq aýdanynyń halqy qala ákimimen kezdesýde jol sapasyna qatysty shaǵym aıtqan edi
Almatynyń Ermensaı shaǵynaýdanyndaǵy Talapty kóshesi taqtaıdaı tegisteldi. Jarokov kóshesi boıyndaǵy gúlder úshin sýarý júıesi jańartyldy. Al Qazaqfılm yqshamaýdanynda qýraǵan aǵashtar kesildi. Bostandyq aýdany turǵyndarynyń qala ákimimen kezdesýinde kótergen máseleleri kóp uzamaı sheshilip jatyr, dep habarlaıdy Almaty-akshamy.kz Almaty.tv-ge silteme jasap.
Bul – Ermensaı shaǵynaýdanyna qaraıtyn Talapty kóshesi. Bostandyq aýdanynyń halqy qala ákimi Erbolat Dosaevpen kezdesýde jol sapasyna qatysty shaǵym aıtqan edi. Olar kóshedegi oıyqtyń kóptigi jaıaý júrginshige de, kólikke de yńǵaısyzdyq týdyrady. Sondyqtan joldyń tesilgen 1 shaqyrymyna asfált tóseýdi surapty. Aıtqandaryn qala ákimdigi eki etpedi.
«Iá, endi osy jerde aıta ketetin bir másele jańaǵy kórshiler jınalyp, qala ákimdigine barǵan eken. Endi sonyń nátıjesi jańa asfált tústi. Rızamyz. Jaqsy bári», – dedi qala turǵyny Aqan Nurmanov.
Al 4-tamyzda ótken qala ákimimen kezdesýde Qazaqfılm yqshamaýdanynyń turǵyndary qýraǵan aǵashtardy kesýdi suraǵan. Óıtkeni shirigen butalar adam ómirine qaýip tóndiredi. Jurtshylyqtyń bul tilegi de oryndaldy.
«Qala ákimine alǵysymyz sheksiz! Qala ákimimen kezdesý kezinde ótinish aıtqanbyz. Aǵashtar úıdiń shatyryna qulap, qıyndyq týdyrǵan edi. Sonyń bári kesildi», – dedi qala turǵyny Abaı Moldalıev.
Taǵy bir turǵyn Jarokov kóshesin eki bólikke bólip turǵan jolaq ishindegi jasyl-jelekke alańdaǵan bolatyn. Onda sýarý júıesi istemeıtindikten gúlder jaz mezgilinde qýrap ketedi. Sondyqtan bul máseleni nazarǵa alýdy suraǵan edi. Kóp kúttirmeı túıtkil sheshimin tapty.
«Turǵyndar Jarokov kóshesiniń ortasyndaǵy jasyl-jelekterdi sýǵarý úshin sý qubyryn qaıtadan qalpyna keltirýdi ótingen. Qazirgi kezde jóndeý jumystar júrip jatyr. Qarasha aıynda aıaqtaımyz. Kelesi jyly sýarý jumystaryn osy júıemen sýaramyz dep otyrmyz», – dedi Bostandyq aýdany kóriktendirý bóliminiń basshysy Arman Mızambekov.
Aýdandyq ákimdiktegiler Almaty ákimimen kezdesýde aıtylǵan suraqtardyń biri qalmaı sheshiletinin aıtty. Tek az ǵana kútý kerek. Halyq únine qulaq asatyn memleket tujyrymdamasyn basshylyqqa ala otyryp, jaýaptylar aıtylǵan suraqtardy ret-retimen qarap, sheshýge tyrysatynyn jetkizdi.