2023 jyly 1 shildeden bastap 4 kúndik jumys aptasy týraly Eńbek Kodeksine tıisti ózgerister engizildi.
Bul týraly ÓKQ brıfıńinde Almaty qalasy eńbek ınspeksıasy basqarmasynyń basshysy, Bas memlekettik eńbek ınspektory Erkinbek Ámirǵalıev aıtyp berdi, dep habarlaıdy Almaty-akshamy.kz.
Tórt kúndik jumys aptasyn jumys berýshi men qyzmetkerlerdiń kelisimi boıynsha eńbek shartynda belgilenedi.
"Atap aıtsaq, barlyq jumys berýshiler men qyzmetkerler avtomatty túrde tórt kúndik jumys aptasyna aýysady degen sóz emes, óıtkeni aýysý úshin taraptar, ıaǵnı jumys berýshi men qyzmetker osy kelisimge kelip, ony eńbek shartynda rásimdeýi qajet", - dedi spıker.
Spıkerdiń aıtýynsha, bul túzetýdiń otbasy ınstıtýtyn nyǵaıtýǵa jáne memlekettik ortaq jaýapkershilikti, jumys berýshi men qyzmetkerlerdiń, qoǵam músheleriniń jeke densaýlyǵyn nyǵaıtýǵa baǵyttalǵan kóptegen artyqshylyqtary bar.
"Tórt kúndik jumys aptasy Fransıa, Islandıa, Ispanıa sıaqty elderdiń zańnamasynda qarastyrylǵan. Keıbir elderde mundaı túzetýlerdiń tıimdiligi áleýmettik eksperımentter júrgizý arqyly dáleldendi, bul eńbek ónimdiliginiń nasharlamaı, kerisinshe joǵarylaǵanyn kórsetti. Sarapshylardyń pikirinshe, mundaı ózgerister kúızelistiń aldyn alady. Ózgeristerdi engizgen elderdiń tájirıbesi kórsetkendeı, qyzmetkerler aýrýhanaǵa sırek baryp jáne jalpy jumystan suraný azaıǵan", - dedi E.Ámirǵalıev.
Sonymen qatar, kásiporyndar jumys kólemi azaıǵan kezeńde tórt kúndik jumys aptasyn bekitip, odan keıin óndiristik qajettilik týyndaǵan jaǵdaıda alty kúndik jumys aptasyna aýysa alady. Tórt kúndik jumys aptasyn belgileý kezinde kásiporyndar elektr qýaty men keńse shyǵyndaryn da únemdeı alady.
"Osy Kodekste jáne Qazaqstan Respýblıkasynyń ózge de zańnamalarynda kózdelgen jaǵdaılardy qospaǵanda, jumys ýaqytynyń qalypty uzaqtyǵy aptasyna 40 saǵattan aspaýǵa jáne kúndelikti jumystyń uzaqtyǵy 8 saǵattan aspaýy tıis. Sondaı - aq, jumys ýaqytynyń jıyntyq esebin belgileý kezinde - qosymsha jumystardyń jalpy uzaqtyǵy aıyna on eki saǵattan jáne jylyna júz jıyrma saǵattan aspaýy qajet" - dep keńinen túsindirdi spıker.
Bes kúndik, alty kúndik nemese tórt kúndik jumys aptasynda jalpy demalys kúni jeksenbi bolyp tabylady. Bes kúndik jáne tórt kúndik jumys aptasyndaǵy ekinshi nemese úshinshi demalys kúni ujymdyq shartta nemese eńbek tártibiniń erejelerinde ǵana belgilenedi.
Sonymen birge, jumys berýshiler eńbek ınspeksıasyn osyndaı formatqa kóshý týraly habardar etýge mindetti emes jáne tıisinshe ınspeksıada 4 kúndik jumys aptasyna aýysqan uıymdardyń sany týraly aqparat berilmeıdi.