Almatynyń Dostyq shaǵyn aýdanyndaǵy 759 úı ortalyqtandyrylǵan káriz júıesine qosylady.
Erbolat Dosaev Áýezov aýdanyn aralaý barysynda Dostyq shaǵyn aýdanyndaǵy sý burý jelileriniń qurylysymen tanysty. Bul jumys aıaqtalǵan soń 759 úı ortalyq kárizge qosylady, dep habarlaıdy Almaty-akshamy.kz.
Jumysty «Speskommýnstroı» JSHS merdigerlik uıymy 22 kóshede júrgizip jatyr, sý burý jelileriniń jalpy uzyndyǵy 13,7 km. Aýdan ákimi Abzal Egemberdıev qala basshysyna merdigerdiń josparǵa sáıkes, bıyl jyl sońyna deıin Táýke han, Rozybaqıev, Terme kóshelerindegi alǵashqy ýchaskeni tapsyrýy tıis ekenin, al barlyq jumysty 2024 jyl IV toqsanda aıaqtaý josparlanyp otyrǵanyn baıandady.
Qala basshysy aýdan ákimine, Energetıka jáne sýmen jabdyqtaý basqarmasynyń basshylyǵyna «Almaty Sý» jáne qurylys basqarmasymen birlesip 2018 jyly ázirlengen jobamen aınalysýdy tapsyrdy. Qujat nóser kárizi boıynsha jańa normalardy jáne basqa da parametrlerdi eskere otyryp, jańartýdy qajet etedi. Erbolat Dosaev sonymen qatar, aldaǵy kóktemde jol tósemin tolyq qalpyna keltirip, barlyq qyzmettiń jumysyn úılestirý qajettigin atady.
«Bir jerdi eki ret qazbas úshin bárin esepteý kerek. Ókinishke qaraı, bizde kóptegen joba eski. Olardy jańa standarttarǵa sáıkestendirý qajet. Buryn bizde ınjenerlik jelilerdi transheıa ádisimen tóseý kezinde tek transheıa qalpyna keltirildi. Bizge jol tóseminiń enin qalpyna keltirý kerek. Injenerlik jeliler men aryq júıesin tóseý, jol tósemin qalpyna keltirý jáne odan ári kógaldandyrý syndy barlyǵyn úılestirý qajet», - dedi Almaty ákimi Erbolat Dosaev.
Áýezov aýdanyndaǵy barlyǵy 4 ýchaskede sýmen jabdyqtaý jáne sý burý jelilerin jańǵyrtý qajet. 1960-1970 jyldary salynǵan ınjenerlik jeliler 90% tozǵan.
Jumys sapary barysynda qala basshysy Áýezov aýdanynyń turǵyndarymen kezdesti. Erbolat Dosaev aryq jelisin salý boıynsha toqtatylǵan jumys 2024 jyldyń kókteminde qolǵa alynyp, barlyq jol tósemi qalpyna keltiriletinin habarlady.
Sonymen qatar, qala ákimi Iassaýı men Jandosov kósheleriniń qıylysyndaǵy №158 mektepti jóndeý máselesine túsinikteme berdi. Júrgizilgen saýalnamaǵa sáıkes, mektep apatty dep tanyldy. Qazir oqýshy oryndaryn kóbeıtip, qaıta qurý máselesi pysyqtalyp jatyr. Buǵan qosa, Iassaýı jáne Tóle bı kósheleriniń mańynda skver jáne Shalápın kóshesinde arnalǵan balalar alańyn qurýdy da turǵyndardyń ótingen bolatyn. Erbolat Dosaev 2024 jylǵa «Halyq qatysatyn búdjet» baǵdarlamasyn qarjylandyrýdy ulǵaıtý josparlanyp otyrǵanyn, oǵan sáıkes turǵyndar balalar alańdary men serýendeý aımaqtaryn qurý jáne abattandyrý boıynsha ıdeıalardy usynyp, iske asyra alatynyn aıtty.
«Kelesi jyly «Halyq qatysatyn búdjet» boıynsha: qalanyń alty aýdanyna 2 mlrd teńge jáne Alataý men Naýryzbaı aýdandaryna 2,5 mlrd teńge somasyn kóbeıtýdi josparlap otyrmyz. Bul ártúrli ıdeıalardy júzege asyrý múmkindigin arttyrady», - dedi Erbolat Dosaev.