Erbolat Dosaev vandalızmdi boldyrmaý úshin jańa aýlalardy beınebaqylaý kameralarymen jabdyqtaýdy tapsyrdy
Almaty ákimi Erbolat Dosaev Áýezov aýdanyn aralaý barysynda 7 shaǵyn aýdandaǵy aýla aýmaqtaryn abattandyrý jumystarynyń barysymen tanysyp, turǵyndarmen ózekti máseleler boıynsha sóılesti.
7 jáne 12 shaǵyn aýdandarda 35 aýla ornalasqan, onyń 24-i aǵymdaǵy jyly jóndeldi, dep habarlady Áýezov aýdanynyń ákimi Abzal Egemberdıev. Modernızasıalaý aıasynda aýlalarda basketbol, fýtbol alańdary salyndy, jaryq turaqty ári sapaly, endi irgeles aýmaq abattandyrylýda. Jumysty «Senim QurylysServıs» JSHS merdigerlik uıymy júrgizýde. Turǵyndardyń ótinishi boıynsha turaq aımaqtary qosymsha keńeıtilip, búdjet qarajatynyń únemdelýi esebinen kógaldandyrý júrgizilýde.
Áýezov aýdany – Almatydaǵy eń tyǵyz qonystanǵandardyń biri, onyń turǵyn úı qory 1 700 kóppáterli úıden asady, aýmaǵynda 966 aýla ornalasqan. Bul qalanyń basqa aýdandaryna qaraǵanda kóp. Almaty ákimi Erbolat Dosaev barlyq aýlalardyń jaǵdaıyn taldap, úı mańyndaǵy aýmaqtardy jóndeý baǵdarlamasyn jalǵastyrýdy tapsyrdy. Qala basshysy vandalızmdi boldyrmaý úshin barlyq aýlalardy beınebaqylaýmen jabdyqtaý qajettigin atap ótti. Jóndeý jumystary aıaqtalatyn jańa 24 alańda jaqyn arada kameralar paıda bolady, dep habarlady aýdan ákimi Abzal Egemberdıev.
Sondaı-aq, aralaý barysynda Erbolat Dosaev sý basý, kógaldandyrý jáne jańa demalys aımaǵy taqyrybynda 7 jáne 12 shaǵyn aýdandardyń turǵyndarymen kezdesý ótkizdi. Qala basshysy qazirgi ýaqytta kúzgi ekpeler jalǵasyp jatqanyn – aǵymdaǵy jyly kógaldandyrý aıaqtalmaǵanyn, sý basý problemalary josparly túrde sheshilýde ekenin atap ótti. Budan basqa, 2024 jylǵa «Halyq qatysatyn búdjet» baǵdarlamasyn qarjylandyrý ulǵaıtylady: qalanyń 6 aýdanyna 2 mlrd teńgeden jáne Alataý jáne Naýryzbaı aýdandary úshin 2,5 mlrd teńgeden bólý josparlanýda. Qosymsha qarajat halyqtyń eń ózekti jáne suranysqa ıe jobalaryn iske asyrýǵa baǵyttalatyn bolady.
Anyqtama:
Aýla aýmaqtaryn kúrdeli jóndeý aıasynda 2022 jyldan 2023 jylǵa deıin Áýezov aýdanynyń (8, 9, 10, 11 sh/a jáne Jetisý-1,2,3,4) 167 aýlasynda jumystar aıaqtaldy.