Erbolat Dosaev Áýezov aýdanyndaǵy №18 emhananyń jańa ǵımaratynyń qurylys alańynda boldy.
Almaty ákimi Erbolat Dosaev jumys sapary barysynda 340 kelýshige arnalǵan bolashaq emhananyń qurylys alańyn aralady. Aýdany 0,5 ga jer ýchaskesi medısınalyq mekemelerdiń júkteme máselesin sheshý úshin jeke tulǵadan satyp alyndy, dep habarlaıdy Almaty-akshamy.kz.
Eskirgen «Dýboktyń» ornyna №18 qalalyq emhananyń jańa fılıaly salynady. Qazir shaǵyn aýdannyń 11 myńǵa jýyq turǵyndary medısınalyq qyzmet alatyn ǵımaratqa 45 jyl toldy. Ol medısınalyq mekemelerge qoıylatyn zamanaýı talaptarǵa saı emes, energıamen, jylýmen, sýmen jabdyqtaý júıeleri ábden tozǵan. Jańa emhanada pasıentterge dıagnostıkalyq qyzmet kórsetý, sondaı-aq kúndizgi stasıonar qyzmetteri qoljetimdi bolady, kezekte turǵandarǵa arnalǵan oryndar kózdeledi, avtomobıl turaǵy uıymdastyrylady.
Qala basshysy emhananyń kireberisine nazar aýdardy: azamattarǵa yńǵaıly jáne keptelisterdi boldyrmaý úshin Erbolat Dosaev eki jaqty qozǵalys jáne eki jaqqa da erkin ótý múmkindigi bar joldy uzartý máselesin pysyqtaýdy tapsyrdy.
Mamyr sh/a-da Áýezov aýdanynyń turǵyndary úshin emhananyń tehnologıalyq jabdyqtalǵan qosymsha fılıaly ashyldy. Áýezov aýdanynyń aýmaǵynda barlyǵy 11 memlekettik medısınalyq uıym jumys isteıdi, olarǵa 261,1 myń adam tirkelgen. Sondaı-aq 38 jeke medısınalyq mekeme jumys isteıdi.