Bıyl Almaty qalasy densaýlyq saqtaý salasynyń búdjeti 334,2 mlrd teńgeni qurap otyr.
Onyń 158,5 mlrd teńgesi MÁMS paketine tıesili. Bul týraly ÓKQ ótken brıfıńte Medısınalyq saqtandyrý qorynyń Almaty qalalyq fılıaly dırektory Tileýhan Ábildaev málim etti, dep habarlaıdy almaty-akshamy.kz.
Fılıal baspasóz qyzmeti taratqan habarlamaǵa súıensek, qazirgi tańda Qor byltyr qala turǵyndaryna kórsetilgen medısınalyq qyzmet aqysyn tolyq tólep boldy. Barlyq emdeý mekemeleri avans aldy.
«2024 jyly ońtústik astanalyqtar medısınalyq kómekti 213 emdeý mekemesi arqyly ala alady, onyń 122-si – jeke menshik. Bıyl qyzmet kórsetýshiler sany jańa on klınıkamen tolyqty, olardyń deni bastapqy medısınalyq-sanıtarlyq kómek kórsetetin mekemeler, ıaǵnı emhanalar men stomatologıalyq klınıkalar. Olardyń tizimimen Qordyń fms.kz saıty arqyly tanysýǵa bolady», - dep atap ótti Tileýhan Ábildaev.
Bıyldan bastap Qor men medısına uıymdarynyń jumysynda kóptegen prosester ońtaılandyryla bastady. Birinshiden, qarjyny medısına uıymdary arasynda bóliske salý prosesi tolyǵymen avtomattandyryldy. Bul qarjylandyrý prosesin barynsha tezdetýge múmkindik beredi.
«Memleket basshysynyń tapsyrmasy boıynsha Biryńǵaı qyzmet paketin kezeń-kezeńmen qalyptastyrý jumystary qolǵa alyndy. Qazirdiń ózinde úsh nemese odan da kóp kelisimsharttyń ornyna bir kelisimshart, qos qarjylandyrý kóziniń ornyna – bir pýldy paıdalaný jobasy júzege asyrylyp jatyr. Bul basy artyq qaǵazbastylyqtan aryltyp, ásirese, dárigerlerdiń jumysyn jeńildetedi. Munyń pasıentterge keri áseri bolmaıdy, olar medısınalyq kómek túrlerin burynǵysha paıdalana bermek», - dedi fılıal dırektory.