2023 jyly ońtústik astanada mindetti áleýmettik medısınalyq saqtandyrý esebinen kórsetilgen qyzmetterge 140 mlrd teńgege jýyq jumsaldy. Bul týraly Óńirlik komýnıkasıalar qyzmetinde ótken brıfıńte Medısınalyq saqtandyrý qorynyń Almaty qalalyq fılıaly dırektory Tileýhan Ábildaev habarlady.
Aıtýynsha, jyl saıyn medısınalyq saqtandyrý esebinen kardıohırýrgıa, neırohırýrgıa, ýrologıa, travmatologıa, onkologıa, hırýrgıa jáne taǵy da basqa profılder boıynsha myńdaǵan operasıa jasalyp jatyr. Mundaı operasıalar kúrdeliligine baılanysty kúndelikti qala emhanalary men men ǵylymı ortalyqtary deńgeıinde de oryndalýy múmkin.
«Mysaly, 2023 jyly MÁMS arqyly 134 myńnan astam operasıa jasalyp, oǵan 78 mlrd teńge tólengen. Onyń ishinde joǵary tehnologıalardyń kómegimen jasalatyn operasıalar men manıpýlásıalarǵa Qor 21,7 mlrd teńge tóledi. Saqtandyrylmaǵan azamattar osyndaı operasıalardy jasatatyn bolsa qaltasynan birneshe mıllıon tólegen bolar edi», - dep atap ótti Tileýhan Ábildaev.
Ótken jyly Almaty qalasynda 1841 kardıohırýrgıalyq operasıa, 562 neırohırýrgıalyq ota, lor-profıli boıynsha 250 operasıa jasalǵan.
«Sońǵy kezde artroz, artrıt syndy býyn aýrýlarynyń kóbeıýine baılanysty tize, jambas býyndaryn almastyrýshylar sany kúrt artqany belgili. 2023 jyly almatylyq travmatologtar osyndaı 4 670 operasıa jasaǵan. Oǵan MSQ 6,9 mlrd teńge tóledi», - dedi fılıal dırektory.
Sonymen qatar, aǵza almastyrý operasıalary da MÁMS paketi arqyly qarjylandyrylady. 2023 jyly quny 565,6 mln teńgeden asatyn 95 transplantasıa jasaldy. Mundaı bir ǵana otanyń ózi orta eseppen alǵanda 7-9 mln teńge turady. Osy qyzmetterdiń bárin saqtandyrylǵan azamattar MÁMS arqyly qıyndyqsyz paıdalanyp keledi.