Almaty polısıasy el Prezıdentiniń tapsyrmasy aıasynda «qoljetimdi polısıa» jańa formattaǵy jumysyna sáıkes keshendi sharalar qabyldap jatyr.
Bul baǵyttaǵy basym býyn – ýchaskelik polısıa ınspektorlary. Búginde olar mobıldi jáne únemi baılanysta, dep habarlaıdy Almaty-akshamy.kz Polisia.kz-ke silteme jasap.
«Árbir ýchaskelik polısıa qyzmetkeri PIK-pen jáne aýdan turǵyndarymen chat pen messendjerlik baılanysta. Barlyq suraqtar olarǵa tikeleı kelip túsedi. Osy tásildiń arqasynda biz turǵyndardan túsetin ótinishterdiń sanyn 2,5 esege qysqarttyq. №78 polısıa ýchaskesi Almaty oblysynyń aýmaǵynda, "Alataý" shaǵynaýdanynda ornalasqan. Bul jerde 17 kóp qabatty úı jáne 250 jeke turǵyn úı bar. Birneshe jyl buryn biz Facebook-te qyzmettik akkaýnttar ashqan bolatynbyz, sıgnaldar kelip jatyr. Sonymen qatar shaǵyn aýdanymyzdyń turǵyndary arasynda WhatsApp, Facebook chattary bar. Barlyq habarlamalarǵa jedel túrde jaýap berip jatyrmyz», – dedi 78-ÝPP aǵa ýchaskelik ınspektory Nurbol Elýbaev.
Sondaı-aq ýchaskelik polısıa ınspektorlarynyń ımıjin kóterý jáne halyq arasynda tanylýyn arttyrý maqsatynda “Sálemetsiz be, men sizdiń ýchaskelik ınspektoryńyzbyn!” naýqany ótkizilip jatyr. Al aýdan turǵyndarymen jáne PIK tóraǵalarymen kezdesýler azamattardyń máselelerin tez ári tıimdi sheshýge múmkindik beredi.
«Men "Alataý" shaǵynaýdanynyń turǵynymyn. Bizdiń ýchaskelik ınspektorlar óte jyldam áreket etetinin atap ótkim keledi. Óıtkeni olar táýlik boıy baılanysta. Olardyń telefondary únemi qosýly», – deıdi jergilikti turǵyn Tatána Abajeı.
Eske sala keteıik, buǵan deıin qala ákimdigimen birlesip, ýchaskelik polısıa pýnktteri úshin jańa ǵımarattardy kezeń-kezeńimen alýdy kózdeıtin úshjyldyq jospar ázirlenip, bekitilgen.