Alyp shahardyń osy aptadaǵy mańyzdy jańalyqtaryna sholý.
Baspanaly bolý – basty qajettilik
Apta bastala sala megapolıste jastarǵa arnalǵan qarjylyq keńes berý baǵdarlamasy bastaldy. Bul joba alyp shahardyń jastaryna aıryqsha mańyzdy, sebebi Almatyda ómir súrý úshin baspanaly bolý basty qajettilik.
Otbasy bankpen birlesip jasalǵan baǵdarlama jastardyń qarjylyq saýattylyǵyn arttyryp, óz qarajatyn tıimdi basqarýǵa kómektesýge baǵyttalǵan.
Keńes alýǵa komúnıtı ortalyqtardyń jumys kestesine sáıkes kelýge bolady. Keńes berý kúnin bilý úshin ózińizge yńǵaıly komúnıtı ortalyqqa baryp, tolyq aqparat alýǵa bolady.
Megapolıs metrosyndaǵy qaýipsizdik
«Raıymbek batyr» stansıasynda metropolıtenniń zamanaýı qaýipsizdik standarttaryna sáıkes keletin jańa ýaqytsha qorshaýlar ornatyldy.
Olar eki negizgi qyzmet atqarady: jolaýshylar úshin qorǵanys quraly bolyp tabylady jáne jarnamalyq qurylym retinde paıdalanylady.
Qazirgi ýaqytta bul qorshaýlardyń jel júktemesine tózimdiligi tekserilýde. Barlyq qajetti synaqtardan ótkennen keıin osyndaı qorshaýlar metronyń basqa stansıalarynda da ornatylatyn bolady.
Qaıta túlegen «Selınnyı»
1964 jyly salynǵan «Selınnyı» kınoteatrynyń ǵımaraty Qazaqstandaǵy alǵashqy táýelsiz zamanaýı óner ordasyna aınalady.
Almatylyq kópfýnksıonaldy zamanaýı óner ordasyna aınalýda. Jobanyń sáýletshisi brıtandyq Asıf Han ǵımarattyń negizgi arhıtektýralyq erekshelikterin saqtaı otyryp, ony zamanaýı standarttarǵa saı beıimdedi. Ǵımarattyń tolqyndy pishindegi qasbeti arnaıy fıbrobetonmen qaptalyp, petroglıfterge uqsas bederli elementtermen árlenedi. Asıf Hannyń aıtýynsha, bul sheshim sýretshi Evgenıı Sıdorkınniń keńestik kezeńdegi keskindemelik shyǵarmasyna negizdelgen, ol qazaqtyń dástúrli turmysyn beınelegen.
Mopediń tirkeýli me?
Tirkeý naýqany bastalǵaly beri 500-den astam moped qoldanýshy bul prosedýradan ótken: olar kólik quralynyń memlekettik nómirin, tehnıkalyq tólqujatyn aldy jáne jol qozǵalysynyń basqa qatysýshylary sıaqty zańdy jaýapkershilikke tartylady.
Sonymen qatar moped júrgizýshileriniń A1 júrgizýshi sanaty bolýy kerek. 5 sáýirinen bastap mopedterdi mehanıkalyq kólikterge teńestiretin zańnamalyq túzetýler kúshine enedi. Osy kúnnen bastap mopedterdi polısıada tirkelgennen keıin jáne tıisti júrgizýshi kýáligi bolǵannan keıin ǵana paıdalanýǵa ruqsat etiledi.
Almaty - Smart City
Júrgizýshisi joq taksıler, qoǵamdyq kólikter, kólik keptelisine qaraı rettep turatyn «aqyldy baǵdarshamdar»... Qazirgi iri megapolısterdi mundaı jańa tehnologıasyz elestetý qıyn. Smart City, ıaǵnı «aqyldy qalany» qurý baǵytyndaǵy jumys Almaty qalasynda da qarqyndy túrde júrip jatyr.
«Biryńǵaı beınemonıtorıng júıesi» jobasynyń basty mindeti – barlyq qalalyq beınebaqylaý kameralaryn bir platformada biriktirý jáne alynǵan beınematerıalǵa naqty ýaqyt rejıminde saraptama jasaý.
Bıyl qazaqstandyq stýdentter oılap tapqan JolQal.ai jobasy tanystyryldy. Joba boıynsha jasandy ıntellekt joldaǵy shuńqyrlar men oıyqtardy anyqtaýǵa kómektesedi. Beınekameralar avtobýstarda, jedel járdem kólikterinde, polısıa qyzmetkerleriniń kólikterinde ornatylyp, avtomatty rejımde túsirilgen beınejazbalardy óńdep, qala kósheleriniń qaı bóliginde oıyqtar bar ekenin kórsetedi.
Nópir kólikti Almaty
Qalamyzǵa kún saıyn qansha kólik kirip shyǵady? Qalalyq mobıldilik basqarmasynyń basshysy Saǵyndyq Telibaevtyń aıtýynsha, kún saıyn 300 myńnan astam kólik kirip shyǵady. Aǵylǵan kólik aǵynyn azaıtý úshin qoǵamdyq kóliktiń sanyn arttyrý mańyzdy.
Qazir shaharda 201 turaqty marshrýt uıymdastyrylǵan, onyń 147-si qalalyq, 54 qala mańyna qatynaıtyn qoǵamdyq kólikter. Al onyń ishinde áleýmettik mańyzy bar qatynastar tizbesine tek 178 marshrýt engizilgen.
Sharyqtaǵan shyraq
Almaty turǵyndary jylý tarıfteriniń kúrt qymbattaǵanyna shaǵymdanǵannan keıin, "Almaty jylý júıesi" JSHS jańa tarıfterdi qalaı esepteıtinin túsindirdi.
Almatylyqtar jalpyúılik esepteý quraldaryna sáıkes, páter aýmaǵyna qaraı toptarǵa bólinip tólem jasaıdy:
1-top – jylytý aýdany 100 m² deıin.
2-top – 100-den 200 m² deıin.
3-top – 200 m² joǵary.
Eger úıde jalpyúılik esepteý quraly bolsa, jylý men ystyq sýǵa turaqty tólem bolmaıdy. Tarıf syrtqy aýa temperatýrasy men naqty tutyný mólsherine baılanysty.
Týrıserdi tamsandyrǵan Almaty
Tuıyq Sý shatqalynda zamanaýı týrısik ortalyqtyń qurylysyna 380 mln.teńge bóldi. Jobany qarjylandyrý basym baǵyttardyń biri retinde týrızmdi qoldaý sheńberinde «Almaty Business-2025» kásipkerlikti damytýdyń óńirlik baǵdarlamasy boıynsha júzege asyrylady.
Vızıt-ortalyq qonaq úımen, kafemen, dárihanamen, jabdyqtardy satyp alýǵa jáne jalǵa alýǵa arnalǵan dúkenmen, kádesyı dúkenimen jáne shyǵarmashylyq is-sharalar ótkizýge arnalǵan aımaqpen jabdyqtalady.
Jobanyń negizgi maqsaty-jergilikti ekotýrızmdi damytý úshin jaǵdaı jasaý, halyqty jaıly rekreasıalyq demalyspen qamtamasyz etý, Almatynyń týrısik tartymdylyǵyn arttyrý.
Jeńimpazdar mekeni
Almaty Qytaıdyń Harbın qalasynda ótip jatqan Azıa oıyndarynyń jeńimpazy men júldegerlerin qarsy aldy.
Olardyń qatarynda - Sherzod Hashırbaev, Asylhan Asan, Evgenıı Koshkın, Aıana Joldas, Ardana Mahanova, Krıstına Sılaeva bar. Almaty halyqaralyq áýejaıynda Harbın qalasynan qanjyǵaly kelgen qazaqstandyq sportshylardy saltanatty qarsy alý rásimi boldy. Oǵan qala ákimshiliginiń ókilderi, jankúıerler men sportshynyń týǵan-týystary qatysty.
Halqyńa jaqyn bol!
Beısenbi kúni Almaty qalasynyń ákimi Jetisý aýdanynyń turǵyndarymen kezdesti.
Erbolat Dosaev halyqpen kezdesý barysynda aýdandaǵy ınjenerlik ınfraqurylymdy damytý jónindegi nátıjeler men josparlar týraly aıtty. Aýdannyń ótken jylǵy áleýmettik-ekonomıkalyq damýy oń serpin kórsetti. 2024 jyly aýdan búdjeti 27%-ǵa ósip, 21,4 mlrd teńgege jetti.
Aýdanda zamanaýı ınovasıalyq shyǵarmashylyq ortalyǵyn salý boıynsha jobalaý-smetalyq qujattama ázirlenip jatyr. «Jaıly mektep» ulttyq jobasy aıasynda Boraldaı kóshesinde 1 200 oryndyq jańa mekteptiń qurylysy jalǵasýda. Ol bıylǵy qyrkúıekte ashylady.
Maýsym aıynda Kemel yqshamaýdanynda 12 ga jaǵalaýdy abattandyrý jumystary bastalady, qyrkúıek aıynda Aınabulaq shaǵyn aýdanynda 10 ga saıabaq aımaǵyn abattandyrý jobasy qolǵa alynady. Maýsymda Seıfýllın dańǵyly men Jansúgirov kóshesiniń qıylysyndaǵy jolaıyryqtyń qurylysy aıaqtalady.
Almatyda jasalǵan álemdik rekord
Shahardyń Áýezov aýdanyna qarasty №116 mekteptiń 11-synyp oqýshysy Saıa Qydyráli IELTS emtıhanynda 9 bal alyp, álemdik rekordqa qol jetkizdi.
«Negizinen, men IELTS-ty ózimniń múmkindigimdi, bilimimdi sarapqa salý úshin tapsyrǵan edim. Jalpy, munda tyńdaý jáne sóıleý kezeńderi barlyǵyna birdeı. Reading jáne Writing-ke keletin bolsaq, olardyń baǵdarlamasy úmitkerlerdiń IELTS tapsyrý arqyly qol jetkizgisi keletin maqsattaryna qaraı tańdalady. Al General Training-ti eger siz aǵylshyn tilinde sóıleıtin elge kóshýdi nemese sol jerde jumysqa ornalasýdy josparlasańyz, al Academic-ti (akademıalyq test) aǵylshyn tilinde sóıleıtin ýnıversıtette oqyǵyńyz kelse tapsyrasyz. Aǵylshyn tilin erkin sóılesem de men joǵary bal alý úshin buǵan deıin halyqaralyq emtıhandy 20 ret tapsyrdym», dedi «ALATAU AQPARAT» ujymyna arnaıy kelip, qýanyshymen bólisken Saıa Qydyráli.
Eskirmegen ánder
Almatyda Eskendir Hasanǵalıevtiń 85 jyldyǵyna arnalǵan erekshe konsert ótti. «Aınaldym elim» atty konsertte kompozıtordyń kóptegen shyǵarmasy oryndaldy. Onyń ánderi ulttyq qundylyqtardy dáriptep, Qazaqstannyń mádenı murasynyń ajyramas bóligine aınaldy. Eskendir Hasanǵalıevtiń ánderi tek qazaq halqynyń ǵana emes, búkil álem jurtshylyǵynyń júregine jol tapty. Onyń shyǵarmashylyǵy ulttyq birlikti nyǵaıtyp, halyqtyń rýhanı murasyn saqtaýǵa septigin tıgizdi. Bul konsert – kompozıtordyń 85 jyldyq mereıtoıyna arnalǵan qurmettiń kórinisi retinde, onyń ónerin ári qaraı nasıhattaýǵa úlken múmkindik týǵyzdy.
Kitaphana – mekeni parasattyń
Qalamyzdaǵy Ulttyq kitaphanaǵa Ǵazıza Qudaıbergenqyzy dırektor bolyp taǵaıyndaldy.
Ǵazıza Qudaıbergenqyzy – mádenıet salasynda úlken tájirıbesi bar, kitaphana isin damytýǵa eleýli úles qosyp júrgen bilikti maman.
Ulttyq kitaphana – tek kitap saqtaý orny ǵana emes, sonymen qatar ǵylymı-zertteý, mádenı jáne bilim berý ortalyǵy. Jańa basshynyń kelýimen bul mekeme jańa jobalar men bastamalardyń alańyna aınalatyny sózsiz.
Jaýyz tárbıeshi
Almatyda balany tunshyqtyrǵan balabaqsha tárbıeshisine qatysty is qozǵaldy. Áleýmettik jelide oqıǵanyń beınejazbasy tarady.
Kadrlardan tárbıeshiniń balany oryndyqqa kúshtep otyrǵyzyp, tunshyqtyrǵanyn baıqaýǵa bolady. Bala sol sátte bólmede otyrǵan eki tárbıeshiden kómek suraıdy. Alaıda olar mán bermeı otyra beredi. Bala ata-anasyna jaǵdaıdy ózi jetkizgen. Sosyn ata-ana beınebaqylaý kamerasyn ashyp qaraǵan. Nátıjesinde polısıaǵa aryz jazǵan.
Polısıa departamentiniń málimetinshe, oqıǵanyń mán-jaıy anyqtalyp jatyr. Kináli adamdar Qazaqstan Respýblıkasynyń zańnamasyna sáıkes jaýapkershilikke tartylady.