Osy aptada qalamyzda bolǵan mańyzdy jańalyqtarǵa sholý.
Zańsyz saýdaǵa jol joq!
Almatynyń Medeý aýdanynda 13 zańsyz dúńgirshek súrildi. Bul shara Almaty qalasynyń ákimi Erbolat Dosaevtyń tapsyrmasymen ákimdik bastamasymen júrgizilgen zańsyz dúńgirshekterdi joıý naýqany aıasynda júzege asyryldy. Buzý jumystary 2025 jyly 15 naýryzǵa deıin tolyq aıaqtalady.
Ǵylym salasyndaǵy názik jandylar marapattaldy
Halyqaralyq áıelder kúni qarsańynda Qazaqstan Respýblıkasy Prezıdentiniń janyndaǵy Qazaqstan Respýblıkasynyń Ulttyq ǵylym akademıasy alǵash ret otandyq áıel-ǵalymdarǵa arnalǵan akademık N.Bazanova atyndaǵy marapatty saltanatty túrde tabystaý rásimin ótkizdi. İs-sharaǵa 400-ge jýyq otandyq ǵylymdy damytýǵa aıryqsha úles qosqan jetekshi áıel-ǵalymdar, ǵylymı qyzmetkerler, oqytýshylar men joǵary oqý oryndarynyń, ǵylymı uıymdardyń basshylary qatysty.
Berseń ber baspanańdy...
14-26 naýryz aralyǵynda 35 jasqa deıingi qala jastary úshin «Almaty jastary» baǵdarlamasy aıasynda jeńildetilgen turǵyn úı nesıelerin alý boıynsha ótinishti qabyldaý bastalady.
Baǵdarlamaǵa qatysýǵa ótinishti www.almaty-zhastary2025.kz resmı saıty arqyly berýge bolady, avtorızasıa elektrondyq sıfrlyq qoltańba (ESQ) arqyly júzege asyrylady.
Qystyń sáni – syrǵanaq
Almatyda qysqy maýsymda tegin muz aıdyndaryna 300 myńnan astam adam kelgen. Jeltoqsan men naýryz aralyǵynda qala turǵyndary men qonaqtary úshin 12 tegin muz aıdyny boldy. Buqaralyq sportty damytýǵa jáne qala turǵyndarynyń bos ýaqytyn uıymdastyrýǵa baǵyttalǵan bul joba 2017 jyldan bastap júzege asyrylýda. Osy ýaqyt ishinde ashyq muz aıdyndaryna 2 mıllıonnan astam adam keldi.
Almatyda 8 naýryz qalaı toılanady?
Halyqaralyq áıelder kúni merekesi qarsańynda qala turǵyndary men qonaqtary konsertter, kórmeler, teatr qoıylymdary jáne shyǵarmashylyq kezdesýlerdi tamashalaı alady.
6 naýryz kúni saǵat 11:00-de Ahmet Baıtursynuly mýzeı-úıinde «Alash arystary jubaılary» atty tanymdyq dáris ótedi. İs-sharaǵa Alash arystary urpaqtary Aıman Baısalova, Merýert Bákibaıqyzy, Janara Súleımanova, Jazıra Arǵyn jáne zertteýshi ǵalym qyzdar Svetlana Smaǵulova, Bekzada Qojekeeva, Gúljahan Orda, mýzeı qyzmetkerleri, JOO stýdentteri, qala turǵyndary men qonaqtary qatysady. Jıynda alash qaıratkerleri jubaılarynyń róli men olardyń ómirlik serikterine yqpaly talqylanady. Konferensıada sırek tarıhı málimetter men jańa zertteýler usynylady.
6 naýryzda saǵat 15:00-de, Almaty mýzeıinde «Dástúr. Óner. Ádemilik» atty kórme ashylady. Munda mýzeı qoryndaǵy dástúrli bas kıimder koleksıasy men sýretshi Gúlnár Tabanovanyń jumystary qoıylady.
7 naýryzda saǵat 18:30-da «Alataý» dástúrli óner teatrynda «Anaǵa taǵzym» atty merekelik konsert ótedi. Sahnada belgili ónerpazdar Áset Esjan, Shattyq Ýatqan, Nurbolat Uzaqbaı, Dıas Murathan, Tilek Bazarov jáne Narıman Ábdirahman óner kórsetedi.
8 naýryzda birqatar merekelik is-shara ótedi. Saǵat 17:00-de Yqylas atyndaǵy halyq mýzykalyq aspaptar mýzeıinde «Iirim» tobynyń «Álemniń syıy – áıelge» atty konserti ótedi. Qýyrshaq teatry «Mama dlá Mamontenka» spektaklin qazaq tilinde saǵat 14:00-de, orys tilinde saǵat 12:00-de sahnalaıdy. Anasyz qalǵan mamonttyń anasyn tabýǵa degen talpynysy týraly áserli oqıǵa balalar men eresekterdiń júregin jylýlyqqa, janashyrlyqqa bólep, armandaryna umtylýǵa shaqyrady.
Osy kúni, saǵat 19:00-de «Artıshok» teatrynda «Samruq» bı trýppasy «Aýyl» qoıylymyn sahnalaıdy. İs-shara zamanaýı horeografıa festıvali aıasynda ótedi.
Sonymen qatar, 7 jáne 8 naýryzda Almaty halyqaralyq áýejaıynda Almaty qalasynyń tarıhy mýzeıi qoryndaǵy dástúrli zergerlik buıymdardyń kóshpeli kórmesi uıymdastyrylady.
Almatyda aýyzashardyń baǵasy qansha?
Aılardyń sultany Ramazanǵa da jettik. Al bul aıda oraza ustaý – deni saý balıǵat jasyna tolǵan árbir musylmanǵa paryz.
Aýyz bekitken musylman sáresin úıinen iship shyqqanmen, qalanyń qarbalas sharýasymen, qaptaǵan kólik keptelisimen aýyzasharda úıine jete almaýy da múmkin. Nemese oraza tutqan jaqyndaryna aýyzashar berýge nıettenip, biraq úıinde qonaq kútýge ýaqyty, murshasy bola bermeıtinder de bar. Osyndaı kezde qoǵamdyq tamaqtandyrý oryndaryna júginýge týra keledi.
Almatyda kafe men restoran kóp. Aqshamnews.kz saıtynyń tilshisi solardyń birshamasyna habarlasyp, ramazan aıyndaǵy aýyzashar baǵasyn bilgen edi. Qalamyzda tamaqtanatyn oryn kóp bolǵanymen, olardyń keıbiri orazaǵa arnap mázir qurmapty. Kerisinshe keıbir kishigirim kofehanalardyń ózi aýyzashar jasap jatqany bar. Aýyzasharǵa arnaıy mázir jasap, qyzmetin usynǵandardyń birqatarynyń baǵasy tómendegideı:
Seıfýllın kóshesi 533 mekenjaıynda ornalasqan DISCOVERY COFFEE kofehanacynda aýyzashar setteri 6490 teńgeden (baýyrsaq pen qurma tegin) bastalady.
Brýsılovskıı kóshesi 164-te ornalasqan Arsha meıramhanasynda aýyzasharǵa arnaıy mázir jasalǵan, ortasha chek 4900 teńge (sý men qurma tegin).
Pervomaıskaıa promzona 11 B-da ornalasqan ZERNO gastro-pabynda aýyzashar 5500 teńgeden bastalady.
NN GRAND HALL (Kenesary han 44) meıramhanasynda aýyzashar baǵasy 8000 teńgeden.
RABBAT shaıhanasynda (Rozybakıev 133, Abylaıhan 24) aýyzashar seti 4500 teńgeden bastalady.
Baıtursynov 98 mekenjaıyndaǵy TRENDY meıramhanasynda aýyzashar seti 5490 teńge.
Almagúl yqshamaýdanyndaǵy «HODJA-NASREDDIN» meıramhanasynda aýyzashar baǵasy 7000 teńge.
Tóle bı 279/1 mekenjaıynda ornalasqan MUZ restobarynda aýyzashar baǵasy 5000 teńge.
ASTORIA meıramhanasynda (aǵaıyndy Abdýllınder kóshesi 55) aýyzashar baǵasy 9000 teńgeden bastalady.
Nurmaqov kóshesi 25-te ornalasqan «Shyńǵys han» meıramhana kesheninde 13500 teńge.
Jetisý yqshamaýdanynda ornalasqan Korkem hall-da aýyazashar baǵasy 10000 teńgeden bastalady.
«Úzdik komýnaldyq qyzmetker» baıqaýy jarıalandy
Qala ákimdigi «Almaty – bizdiń ortaq úıimiz» naýqany aıasynda «Úzdik komýnaldyq qyzmetker» baıqaýyn jarıalady.
Ótinim qabyldaý: 5-17 naýryz
Marapattaý: 20 naýryzdan keıin
Kimder qatysa alady? Kópqabatty úıler men aýlalardy kórkeıtýmen aınalysatyn uıymdardyń qyzmetkerleri.
Júldeler:
1-oryn – 150 000 tg
2-oryn – 100 000 tg
3-oryn – 50 000 tg (turmystyq tehnıka)
Qalaı ótinim berýge bolady? Komýnaldyq sharýashylyq bólimine (tómendegi e-mail tizimi) sıpattama, qyzmet kórsetetin aýmaqtardyń tizimi jáne derekterdi óńdeýge kelisim jiberińiz.
Almatylyq rekord
Qaladaǵy haıýanattar baǵy kelýshiler sany boıynsha jańa rekord ornatty. Sońǵy 37 jylda alǵash ret bir jyl ishnde kelýshiler sany 1 097 236 adamǵa jetti. Haıýanattar baǵynda 361 túrge jatatyn 3 838 janýar bar. Olardyń kútimimen 223 qyzmetker aınalysady.
2024 jyly jalpy zoobaqqa kelgen halyqtyń 250 myńy tegin kirdi. Bılet baǵasy da qoljetimdi: eresekter úshin – 800 teńge, al balalar úshin – 300 teńge.
«Taza Qazaqstannyń» alǵashqy aptasy bastaldy
«Taza kósheler» jobasy aıasynda 24 m³ aýmaqty qamtıtyn 2 318 kóshe tazalanady. Qazirgi ýaqytta kún saıyn kóshelerden 150 tonnadan astam qoqys shyǵarylady. 56 jerasty jáne 78 jerústi jaıaý júrginshiler ótkeli, 1 765 aıaldama, 480 baǵdarsham tazalanady.
Árbir altynshy kólik ekologıalyq baqylaýdan ótpeıdi
Byltyr 204 996 ólsheý júrgizilip, 34 708 zańbuzýshylyq anyqtalǵan. Almatyda 2024 jyly ekobeketterde 205 myńǵa jýyq avtokólik tekserilgen.