Almatynyń Almaly aýdanynda ortalyqtandyrylǵan ınjenerlik komýnıkasıalary joq jáne jelileri qaıta jóndeýdi qajet etetin jeke sektorda sý qubyry men káriz jelilerin salý boıynsha eki joba júzege asyrylyp jatyr.
Eki jobanyń biri 2024 jyly bastalyp, osy jyly aıaqtalady. Joba aıasynda aýdannyń 19 kóshesinde 15 shaqyrym ınjenerlik jeliler tóselip, qaıta jóndeýden ótedi, dep habarlaıdy aqshamnews.kz.
Onyń ishinde 6 kóshede jumys aıaqtaldy. Eki jobany júzege asyrý nátıjesinde 6,8 myń tutynýshy ortalyq ınjenerlik jelilermen qamtamasyz etiledi.
Aıta keteıik, 2024 jyly Almaly aýdanynda Indýstrıalnaıa, Sıolkovskıı, Volhovskaıa jáne basqa da 12 kóshede sý qubyry jelilerin salý boıynsha aýqymdy jumystar júrgizildi. Búginde osy kóshelerdiń turǵyndary ortalyq sýmen jabdyqtaý jáne sý burý júıesimen qamtamasyz etildi.
Sondaı-aq, Tóle bı kóshesi men Volhovskaıa kóshesiniń qıylysyndaǵy sý qubyryn qamtamasyz etetin sorǵy stansıasy qaıta jóndelip, kúrdeli jóndeýden ótti. Buǵan deıin stansıa apatty jaǵdaıda bolyp, onyń jabdyqtary 1992 jyldan beri jóndelmegen edi. Jóndeý jumystarynan keıin 4 kópqabatty úıdiń 500-den astam turǵyny úzdiksiz sýmen qamtamasyz etildi.
Jalpy, Almatyda qala ákimi Erbolat Dosaevtyń tapsyrmasymen 2024 jyly qalada 219 shaqyrym jańa sý qubyry jáne sý burý jelileri salyndy, 27,3 shaqyrym qoldanystaǵy jeli jańǵyrtyldy. Bul shamamen 60 myń abonentti qamtýǵa múmkindik berdi. 2025 jyly 240 shaqyrym jeli salý jáne 48 shaqyrym jelini jańǵyrtý josparlanǵan.