Megapolıstegi órtterdiń negizgi sebepteri – aqaýly peshter men salǵyrttyq.
Bul týraly Almaty qalasy tótenshe jaǵdaılar departamentiniń memlekettik órt baqylaý basqarmasynyń bastyǵy Konstantın Kanın Óńirlik komýnıkasıalar qyzmetindegi brıfıńte málimdedi, dep habarlaıdy aqshamnews.kz.
Onyń aıtýynsha, órttiń basty sebebi – elektr jabdyqtaryn paıdalaný erejelerin buzý. Ekinshi orynda – jylytý peshterin durys paıdalanbaý.
Taǵy bir kúrdeli másele – ýly gazdan, tabıǵı gazdan jáne propan-býtannan ýlaný bolyp otyr. Ótken jyly ýlaný saldarynan 15 adam zardap shekken: olardyń 6-ýy ýly gazdan, 9-y tabıǵı gaz ben propan-býtannan ýlanǵan. Spıker mundaı oqıǵalardyń negizgi sebepteri retinde qatty jáne gaz tárizdi otynmen jumys isteıtin peshterdiń aqaýlary men paıdalaný erejelerin elemeýdi atap ótti. Murjalar men jınalǵan kúıeni ýaqytyly tazalamaý – qaýiptiń mańyzdy faktory bolyp qala berýde. Bul jylytý júıelerine turaqty tehnıkalyq qyzmet kórsetý qajettigin kórsetedi.
Órtterdiń basym bóligi azamattyq qorǵaý organdarynyń tikeleı baqylaýynan tys, jeke sektorda tirkelgen. «Sondyqtan, qalalyq Tótenshe jaǵdaılar departamentiniń negizgi profılaktıkalyq is-sharalary naqty osy saladaǵy órtterdiń, qaza bolǵandar men jaraqattardyń sanyn azaıtýǵa baǵyttalǵan», - dep atap ótti Konstantın Kanın.
Ótken jyly profılaktıkalyq is-sharalar sheńberinde BAQ-ta 15 myńnan astam materıal, onyń ishinde baspa basylymdarynda 1 019 maqala, radıoda 9 myńǵa jýyq jáne áleýmettik jelilerde 4 354 jarıalanym ornalastyryldy.