Almaty ákimi Erbolat Dosaev dástúr boıynsha turǵyndarmen birge alma aǵashyn otyrǵyzdy. «Taza Qazaqstan» respýblıkalyq naýqany men «Almaty – bizdiń ortaq úıimiz» qalalyq naýqany aıasynda «Almaty – baq qala» aksıasy ótti.
Negizinen kóshetter Saıaly shaǵyn aýdanyndaǵy Qaraǵaıly ormanǵa, «ALA» saıabaǵynda jáne Boraldaı ózeniniń boıynda baqylaý alańynyń jany syndy Alataý aýdanyndaǵy úsh jerge egildi.
Qaraǵaıly ormanyndaǵy aksıaǵa Almaty ákimi Erbolat Dosaev qatysty. Turǵyndar men ekobelsendilermen birge ÚAK boıyndaǵy saıabaqqa 500 alma jáne 500 órik kósheti otyrǵyzyldy. Al «ALA» saıabaǵynyń aýmaǵynda 2270 kóshet otyrǵyzyldy.
İs-sharaǵa «Alataý» dástúrli óner teatrynyń artıserimen qatar, Álisher Kárimov, Anar Batyrhan, Mádına Sádýaqasova jáne t.b. 1500-den astam qazaqstandyq estrada juldyzdary qatysty.
Skrıpkashy, Qazaqstannyń eńbek sińirgen qaıratkeri Jámılá Serkebaeva bul aksıa adamdardy qalamyzdy kógaldandyrý jáne taza ustaý ıdeıasynyń tóńireginde biriktirgenin jáne ol dástúrge aınalýǵa tıis ekenin atap ótti.
«Almaty qalasy ákimdigine ekologıalyq is-sharany uıymdastyrǵany úshin kóp rahmet. Óte jaqsy uıymdastyrylǵan, almatylyqtar osy ıgi iske shyn yqylasymen qatysyp jatyr. Aǵash otyrǵyzýǵa meniń kóptegen áriptesim, shyǵarmashylyq adamdar, sondaı-aq qalanyń ártúrli uıymynyń ókilderi atsalysty. Bul memlekettik uıymdarda jumys isteıtin sırk, haıýanattar baǵynyń, kitaphanalardyń, mýzeılerdiń, orkestrlerdiń qyzmetkerleri men artıseri. Bárimiz aksıany qoldaýǵa keldik. Eń bastysy, biz qalamyzdy óte jaqsy kóremiz jáne onyń burynǵydan da jasyl ári taza bolǵanyn qalaımyz. «Almaty – bizdiń ortaq úıimiz» keremet naýqan», - dep sózin túıindedi artıs.
Stýdent, Qazaqstan halqy Assambleıasynyń múshesi Raýan Esjanov Almaty qalasy ákimdigine osyndaı mańyzdy oqıǵany ótkizgeni úshin rızashylyǵyn bildirdi. «Bul aksıa jastar men óskeleń urpaq úshin úlgi bolǵandyqtan, aǵashtardy otyrǵyzyp qana qoımaı, odan ári tabıǵatqa qamqorlyq jasaý da mańyzdy. Aǵa býynmen birge aǵash otyrǵyzýǵa qatysqandaryńyz úshin rahmet», - dedi ol.
Esterińizge sala keteıik, aksıa barysynda 8 myńnan astam aǵash otyrǵyzyldy, onyń ishinde 4 myńnan astamy alma. «Qaraǵaıly ormany» saıabaǵynyń aýmaǵynda 500 alma jáne órik kósheti, «ALA» saıabaǵynyń aýmaǵynda 2270 kóshet jáne Boraldaı ózeniniń boıyndaǵy baqylaý alańynda 1000-ǵa jýyq kóshet otyrǵyzyldy.